ប្រធានាធិបតីកូរ៉េខាងត្បូងបានការពារក្រឹត្យច្បាប់អាជ្ញាសឹករបស់លោកថាជាទង្វើនៃអភិបាលកិច្ចសម្រាប់ការគ្រប់គ្រងស្ថានការណ៍ និងបានទាត់ចោលការចោទប្រកាន់ពីបទបះបោរនៅថ្ងៃព្រហស្បតិ៍ នេះ ដោយបានច្រានចោលការប៉ុនប៉ងចោទប្រកាន់ដឹកនាំដោយក្រុមប្រឆាំងនឹងរូបលោក និងការស៊ើបអង្កេតលើវិធានការនេះ កាលពីសប្តាហ៍មុន ។លោកថានេះ មិនអាចអាចជាកម្មវត្ថុនៃការស៊ើបអង្កេតនិងមិនស្មើនឹងការបះបោរនោះទេ។

សេចក្តីថ្លែងការណ៍តាមទូរទស្សន៍របស់ Yoon Suk Yeol បានកើតឡើងប៉ុន្មានម៉ោងមុនពេលគណបក្សប្រឆាំងសេរីនិយមដ៏សំខាន់ដាក់ញត្តិចោទប្រកាន់ថ្មីប្រឆាំងនឹងរូបលោក។ គណបក្សប្រឆាំងគ្រោង ដាក់ញត្តិឲ្យមានការបោះឆ្នោតទម្លាក់តំណែងលោកនៅថ្ងៃសៅរ៍សប្ដាហ៍នេះ។

ការប៉ុនប៉ងចោទប្រកាន់ទម្លាក់តំណែងលោក Yoon បានបរាជ័យកាលពីថ្ងៃសៅរ៍សប្តាហ៍មុន ដោយសមាជិកសភាគណបក្សកាន់អំណាចបានធ្វើពហិការមិនចូលរួមការបោះឆ្នោតនៅរដ្ឋសភា។

ក្រឹត្យច្បាប់អាជ្ញាសឹកកាលពីថ្ងៃទី ៣ខែធ្នូ របស់លោក Yoon បានបង្កើតភាពវឹកវរផ្នែកនយោបាយ និងការតវ៉ាទាមទារឱ្យលោកចុះចេញពីតំណែង ដែលនៅតែបន្ត។

លោកYoonនិយាយថាខ្ញុំនឹងតតាំងដល់ទីបញ្ចប់ ដើម្បីទប់ស្កាត់កងកម្លាំង និងក្រុមឧក្រិដ្ឋជន ដែលទទួលខុសត្រូវចំពោះការធ្វើឱ្យរដ្ឋាភិបាលរបស់ប្រទេសនេះធ្លាក់ក្នុងភាពចលាចល និងរំខានដល់សណ្តាប់ធ្នាប់រដ្ឋធម្មនុញ្ញរបស់ប្រទេសនេះ ក្នុងការទប់ស្កាត់ការគំរាមកំហែងដល់អនាគតនៃសាធារណរដ្ឋកូរ៉េ៕