ប្រព័ន្ធផ្សព្វផ្សាយ CBS News បានរាយការណ៍កាលពីថ្ងៃពុធ ទី១១ ខែធ្នូ ដោយដកស្រង់ប្រភពព័ត៌មានជាច្រើនថា ប្រធានាធិបតីជាប់ឆ្នោតរបស់សហរដ្ឋអាមេរិក លោក Donald Trump បានអញ្ជើញប្រធានាធិបតីចិន លោក Xi Jinping ឱ្យចូលរួមក្នុងពិធីឡើងកាន់តំណែងរបស់លោកនៅខែក្រោយនេះ។

ប្រព័ន្ធផ្សព្វផ្សាយ CBS បានរាយការណ៍ថា ការអញ្ជើញទៅចូលរួមពិធីឡើងកាន់តំណែងនៅថ្ងៃទី២០ ខែមករា ខាងមុខនេះ នៅទីក្រុងវ៉ាស៊ីនតោន បានកើតឡើងបន្ទាប់ពីការបោះឆ្នោតប្រធានាធិបតីកាលពីថ្ងៃទី៥ ខែវិច្ឆិកា ប៉ុន្តែវាពុំទាន់ច្បាស់នោះទេថាតើ ការអញ្ជើញនេះត្រូវបានទទួលយក ឬយ៉ាងណា។ ស្ថានទូតចិនប្រចាំនៅទីក្រុងវ៉ាស៊ីនតោន ពុំបានឆ្លើយតបភ្លាមៗចំពោះសំណើសុំការអត្ថាធិប្បាយទេ។

លោក Trump បាននិយាយនៅក្នុងបទសម្ភាសន៍មួយជាមួយ NBC News ថា លោក «មានភាពចុះសម្រុងគ្នាយ៉ាងល្អ» ជាមួយលោក Xi ។ លោក Trump បានតែងតាំងអ្នកប្រកាន់តឹងចំពោះប្រទេសចិនជាច្រើនរូបឲ្យកាន់តំណែងសំខាន់ៗក្នុងរដ្ឋបាលនៅពេលខាងមុខរបស់លោក រួមទាំងសមាជិកព្រឹទ្ធសភា លោក ម៉ាកូ រូប៊ីយ៉ូ(Marco Rubio) ជារដ្ឋមន្ត្រីការបរទេស។

លោក Trump បាននិយាយថា លោកនឹងដាក់ពន្ធបន្ថែម ១០% លើទំនិញរបស់ចិន លុះត្រាតែទីក្រុងប៉េកាំង ធ្វើអ្វីៗបន្ថែមទៀតដើម្បីបញ្ឈប់ការជួញដូរសារធាតុហ្វង់តានីល ជាសារធាតុញៀនខ្លាំង ហើយលោកក៏បានគំរាមយកពន្ធលើសពី៦០% លើទំនិញរបស់ចិន ខណៈកំពុងដំណើរការយុទ្ធនាការ។

នៅចុងខែវិច្ឆិកា ប្រព័ន្ធផ្សព្វផ្សាយរដ្ឋរបស់ចិន បានព្រមានលោក Trump ថា ការសន្យារបស់លោកក្នុងការដាក់ពន្ធបន្ថែមលើទំនិញរបស់ចិនជុំវិញលំហូរនៃសារធាតុហ្វង់តានីល អាចអូសទាញប្រទេសដែលមានសេដ្ឋកិច្ចកំពូលទាំងពីរ ធ្លាក់ចូលទៅក្នុងសង្រ្គាមពន្ធ ដែលបំផ្លាញគ្នាទៅវិញទៅមក។