សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានផ្តាំទៅប្រទេសមួយចំនួន ដែលបាន​ចេញ​របាយការណ៍ទាក់ទងនឹងបញ្ហាការជួញដូរមនុស្ស នាពេលកន្លងទៅ ឬនៅពេល​អនាគត​ គប្បីត្រូវធ្វើ​ឲ្យមានតម្លាភាព កុំដាក់បន្ទុកដល់ប្រទេសដទៃ ក្នុងន័យផ្សេង ​និងទទួលយកព័ត៌មានតែម្ខាងនោះ។

ក្នុងឱកាសអញ្ជើញជាអធិបតីភាព ក្នុងទិវាជាតិប្រឆាំងការ​ជួញដូរ​មនុស្ស ១២ធ្នូ ឆ្នាំ២០២៤ នៅ​មជ្ឈមណ្ឌលសន្និបាត និងពិព័រណ៍កោះពេជ្រ នាថ្ងៃទី១២ ខែធ្នូ ឆ្នាំ២០២៤នេះ សម្តេចធិបតី ហ៊ុន ម៉ណែត នាយករដ្ឋមន្រ្តី បានលើកឡើងថា កម្ពុជាទទួលស្គាល់ថា មានបញ្ហានៃការជួញដូរមនុស្ស ប៉ុន្តែមិនដូចរបាយការណ៍មួលបង្កាច់របស់ប្រទេសមួយចំនួននោះឡើយ ខណៈរបាយការណ៍​ទាំងនោះ គឺមានចេតនាបង្ខូចកិត្តិយសដល់ប្រទេសកម្ពុជា​សុទ្ធសាធ ដូច្នេះកម្ពុជា​មាន​សិទ្ធិ​ក្នុង​ការឆ្លើយតបចំពោះរបាយការណ៍មិនពិតទាំងនោះ។

ក្នុងឱកាសនោះ​សម្តេចធិបតីនាយករដ្ឋមន្រ្តី បានលើកឡើងផងដែរថា បញ្ហានៃការជួញដូរ​មនុស្ស​គឺជា​បញ្ហា​ស្មុគស្មាញ​យ៉ាងខ្លាំង​ ហើយ​បញ្ហានេះ​គឺបាន​កើតឡើង​តាំង​ពីយូរណាស់​មកហើយ​នៅ​ក្នុងតំបន់ ​ក៏ដូចជាពិភពលោក​យើងទាំងមូល ​គ្រាន់តែពីមុន វាធ្វើឡើងជាចំហរការទិញ​ដូរ​នូវ​ទាសករ។ ប៉ុន្តែនៅសម័យទំនើបនេះការ​ជួញដូរ​មនុស្ស​ត្រូវ​បាន​គ្រប់​ប្រទេសទាំងអស់​រួមគ្នា​ដើម្បី​ទប់ស្កាត់ ​ហើយវា​បាន​ប្រែក្លាយ​ពី​ទម្រង់​ចំហរ​ទៅជា​ទម្រង់​លួចលាក់ ​ឬហៅថា ​ទម្រង់ការ​ច្នៃប្រឌិត​ ឬ​នវានុវត្តន៍​ច្រើន។

សម្តេចធិបតី​នាយករដ្ឋមន្រ្តី បានបន្ថែមទៀតថា ​ទម្រង់​នៃការ​ជួញ​ដូរមនុស្សនេះ ​គឺគ្មានអ្វីឲ្យច្បាស់ លាស់​នោះទេ ដោយវាបានធ្វើឡើងបន្លំជាមួយ​នឹងអ្វីមួយដែលស្របច្បាប់ ដូចជា​ករណី​រៀប​អាពាហ៍ពិពាហ៍​ ជាមួយប្តី​បរទេសជាដើម ​ពេលខ្លះ​គេបានការជាមួយយើង ក្នុងនាមជាប្តីប្រពន្ធ ប៉ុន្តែ​សម្រាប់ដល់ប្រទេសគេ បែរជាបុរសជាប្តីនោះ យកស្រ្តីនោះ ទៅលក់បន្ត​ទៅអ្នកផ្សេងជាដើមនោះ ហើយ​របាយការណ៍​ខ្លះ​បានចេញ​ មក​មួលបង្កាច់​កម្ពុជា​ ថា​មានការ​ជួញដូរ​មនុស្សទៅវិញ៕អត្ថបទបាន ចក់