ប្រទេសអ៊ុយក្រែន និងរុស្ស៊ី បានដាក់កំហុសគ្នាទៅវិញទៅមក ជុំវិញការវាយប្រហារលើយានយន្តមួយគ្រឿង ដែលបានកើតឡើងនៅក្នុងតំបន់ Zaporizhzhia ភាគខាងត្បូងប្រទេសអ៊ុយក្រែន។ រថយន្តនោះ កំពុងដឹកបុគ្គលិករបស់អង្គការឃ្លាំមើលនុយក្លេអ៊ែររបស់អង្គការសហប្រជាជាតិ។

រុស្ស៊ី បានដណ្តើមយកការគ្រប់គ្រងរោងចក្រថាមពលនុយក្លេអ៊ែរ Zaporizhzhia បន្ទាប់ពីបានឈ្លានពានចូលអ៊ុយក្រែន។ ទីភ្នាក់ងារថាមពលអាតូមិកអន្តរជាតិ(IAEA) បាននឹងកំពុងបញ្ជូនបុគ្គលិកទៅត្រួតពិនិត្យសុវត្ថិភាពនៅរោងចក្រនុយក្លេអ៊ែរនោះ។

ប្រធានាធិបតីអ៊ុយក្រែន លោក Volodymyr Zelenskyy បាននិយាយនៅលើប្រព័ន្ធផ្សព្វផ្សាយសង្គមថាយានដ្រូនរបស់រុស្ស៊ី បានវាយប្រហារលើក្បួនរថយន្តរបស់ទីភ្នាក់ងារ IAEA ។ រូបថតមួយសន្លឹកដែលបានបង្ហោះនៅលើគណនីរបស់ លោក Zelenskyy បង្ហាញពីរថយន្តដែលបានរងការខូចខាត ប៉ុន្តែ លោកបាននិយាយថា ពុំមានអ្នករងរបួសទេ។

លោក Zelenskyy បាននិយាយថា រុស្ស៊ី ដឹងយ៉ាងច្បាស់ពីអ្វីដែលពួកគេកំពុងធ្វើ និងធ្វើសកម្មភាពដោយចេតនា។ លោក បានអំពាវនាវឲ្យមាន«ការឆ្លើយតបច្បាស់លាស់ និងមិនរួញរា» ពីសហគមន៍អន្តរជាតិ។

ក្រសួងការបរទេសរុស្ស៊ី បាននិយាយនៅក្នុងសេចក្តីថ្លែងការណ៍មួយកាលពីថ្ងៃពុធ ថា អ៊ុយក្រែន បានវាយប្រហារទៅលើរថយន្តនោះ។

អគ្គនាយកទីភ្នាក់ងារ IAEA លោក Rafael Grossi បាននិយាយថា រថយន្តទីភ្នាក់ងារផ្លូវការមួយគ្រឿងបានរងការវាយប្រហារ និងខូចខាតយ៉ាងធ្ងន់ធ្ងរ ក្នុងពេលក្រុមការងាររបស់ទីភ្នាក់ងារ IAEA ដែលធ្វើការនៅរោងចក្រនុយក្លេអ៊ែរ កំពុងត្រូវបានប្តូរវេន។ លោក Grossi និយាយថា ការវាយប្រហារទៅលើអ្នកដែលព្រួយបារម្ភចំពោះសុវត្ថិភាព និងសន្តិសុខនៅរោងចក្រថាមពលនុយក្លេអ៊ែរ គឺ «មិនអាចទទួលយកបានជាដាច់ខាត» ប៉ុន្តែ លោក ពុំបាននិយាយថា អ្នកណា ជាអ្នកទទួលខុសត្រូវចំពោះឧបទ្ទវហេតុ នេះទេ។