អ្នកជំនាញសិទ្ធិមនុស្សរបស់អង្គការសហប្រជាជាតិ (UN) កាលពីថ្ងៃពុធ បានរិះគន់សហរដ្ឋអាមេរិកចំពោះ «ស្តង់ដារពីរ» របស់ខ្លួនក្នុងការដោះស្រាយការរំលោភច្បាប់អន្តរជាតិ ក្នុងជម្លោះអ៊ីស្រាអែល និងប៉ាឡេស្ទីន ដោយជំរុញឱ្យបញ្ចប់និទណ្ឌភាពសម្រាប់ទាំងអ៊ីស្រាអែល និងអ្នកគាំទ្ររបស់ខ្លួន។

នៅក្នុងសន្និសីទសារព័ត៌មាន ក្នុងទីក្រុងហ្សឺណែវ ប្រទេសស្វីស អ្នកជំនាញបួនរូបដែលមានតួនាទីជាអ្នករាយការណ៍ពិសេសរបស់ក្រុមប្រឹក្សាសិទ្ធិមនុស្សអង្គការសហប្រជាជាតិ បានជំរុញសហគមន៍អន្តរជាតិ ឱ្យអ៊ីស្រាអែលទទួលខុសត្រូវចំពោះការរំលោភច្បាប់អន្តរជាតិ រួមទាំងអំពើហិង្សាមិនសមាមាត្រ ការរារាំងផ្នែកមនុស្សធម៌ និងការពង្រីកទីតាំងលំនៅនៅក្នុងដែនដីដែលប៉ាឡេស្ទីនកាន់កាប់។

លោកស្រី Margaret Satterthwaite អ្នករាយការណ៍ពិសេសស្តីពីឯករាជ្យភាពនៃចៅក្រម និងមេធាវីបាន រិះគន់រដ្ឋាភិបាលសហរដ្ឋអាមេរិក ចំពោះការធ្វើឱ្យខូចដល់តុលាការព្រហ្មទណ្ឌអន្តរជាតិដោយការគំរាមកំហែង «ហួសហេតុ» ហើយបានសង្កត់ធ្ងន់លើតម្រូវការយុត្តិធម៌អន្តរជាតិដើម្បីអនុវត្តដោយស្មើរភាពគ្នា។ លោកស្រី Satterthwaite និយាយថា «វាដល់ពេលហើយ ដើម្បីបញ្ចប់ស្តង់ដារពីរ» ។

លោកស្រី Francesca Albanese អ្នករាយការណ៍ពិសេសស្តីពីស្ថានភាពសិទ្ធិមនុស្សក្នុងដែនដីប៉ាឡេស្ទីន ដែលកាន់កាប់តាំងពីឆ្នាំ១៩៦៧ បានលើកឡើងពីការស្លាប់និងរងរបួសរបស់ជនស៊ីវិលខ្ពស់ និងការវាយប្រហារលើបុគ្គលិកអង្គការសហប្រជាជាតិ ជាភស្តុតាងនៃការរំលោភបំពានជាប្រព័ន្ធ ធ្វើឡើងដោយអ៊ីស្រាអែល ដែលត្រូវបានសម្របសម្រួលដោយកង្វះការទទួលខុសត្រូវជាអន្តរជាតិ។