អ្នកនាំពាក្យរដ្ឋាភិបាលចាំផ្ទះរបស់បារាំង បាននិយាយកាលពីពីថ្ងៃពុធ (១១ ធ្នូ) ថា ប្រធានាធិបតីបារាំង លោក Emmanuel Macron កំពុងស្វះស្វែងរកកិច្ចព្រមព្រៀងនយោបាយ ដែលនឹងអនុញ្ញាតឱ្យលោកតែងតាំងនាយករដ្ឋមន្ត្រីថ្មី និង "ធានាស្ថិរភាពរបស់ប្រទេស" បន្ទាប់ពីការលាលែងពីតំណែងរបស់លោកនាយករដ្ឋមន្ត្រី Michel Barnier ។

អ្នកនាំពាក្យរូបនោះបន្តថា លោក Macron បានទទូចថា នៅពេលនេះមិនមានសម្ព័ន្ធនយោបាយ "ទូលំទូលាយ" ជាងក្រុមចម្រុះបច្ចុប្បន្ននោះទេ រវាងសម្ព័ន្ធមិត្តកណ្តាលនិយមរបស់លោក និងក្រុមអភិរក្សនិយមមកពីបក្សសាធារណរដ្ឋ ដែលមិនមានសំឡេងភាគច្រើននៅក្នុងសភា។

កិច្ចប្រឹងប្រែងរកប្រមុខរដ្ឋាភិបាលថ្មីនេះបានធ្វើឡើងបន្ទាប់ពីការបោះឆ្នោតដកសេចក្ដីទុកចិត្តជាប្រវត្តិសាស្ត្រ ដោយសារជម្លោះថវិកានៅក្នុងរដ្ឋសភា ដែលបានធ្វើឱ្យបារាំង មិនមានរដ្ឋាភិបាលដំណើរការ។

ចាប់តាំងពីសប្តាហ៍មុនមក លោក Macron បានជួបពិភាក្សាជាមួយអ្នកនយោបាយពីក្រុមឆ្វេងនិយម និងស្តាំនិយម រួមទាំងមេដឹកនាំសង្គមនិយម ដែលឥឡូវនេះលេចចេញជាគន្លឹះសំខាន់ក្នុងកិច្ចខិតខំប្រឹងប្រែងដើម្បីបង្កើតរដ្ឋាភិបាលដែលមានស្ថិរភាពជាងមុន។

ការពិភាក្សាទាំងនោះមិនពាក់ព័ន្ធនឹងបក្សរួបរួមកម្លាំងជាតិ (RN) ស្តាំនិយមជ្រុល ដែលដឹកនាំដោយលោកស្រី Marine Le Pen និងបក្ស LFI ឆ្វេងនិយមប្រកាន់ជំហរតឹងនោះទេ ដោយសារលោក Macron លើកឡើងថា លោកនឹងពិភាក្សាតែជាមួយកម្លាំងនយោបាយប្រកាន់ជំហរកណ្ដាលប៉ុណ្ណោះ៕