មន្រ្តីរតនាគារ និងជារដ្ឋមន្ត្រីសេវាកម្មហិរញ្ញវត្ថុ លោក ស្ទេហ្វិន ចូនស៍ (Stephen Jones) បានប្រកាសនៅថ្ងៃព្រហស្បតិ៍ (១២ ធ្នូ) នេះថា ប្រទេសអូស្ត្រាលី គ្រោងនឹងច្បាប់ថ្មីដើម្បី "បង្កើតការលើកទឹកចិត្តផ្នែកហិរញ្ញវត្ថុ" សម្រាប់ក្រុមហ៊ុនបច្ចេកវិទ្យាធំៗ ដើម្បីបង់ប្រាក់ឱ្យក្រុមហ៊ុនប្រព័ន្ធផ្សព្វផ្សាយអូស្ត្រាលី ចំពោះមាតិកាព័ត៌មាននៅលើបណ្ដាញសង្គមរបស់ពួកគេ។

ជំហានដែលត្រូវបានពិពណ៌នាថាជា "គំនិតផ្តួចផ្តើមនៃការចរចារព័ត៌មាន" មួយនេះ បានដាក់សម្ពាធលើក្រុមហ៊ុនបច្ចេកវិទ្យាខ្នាតយក្សរបស់ពិភពលោក ដូចជាក្រុមហ៊ុន Meta Platforms ដែលជាម្ចាស់បណ្ដាញសង្គម Facebook និងក្រុមហ៊ុន Google ឱ្យបង់ប្រាក់ដល់អ្នកបោះពុម្ពផ្សាយសម្រាប់មាតិកាព័ត៌មាន បើមិនដូច្នេះទេនឹងប្រឈមហានិភ័យនៃការបង់ប្រាក់ពិន័យរាប់លានដុល្លារដើម្បីបន្តប្រតិបត្តិការនៅអូស្ត្រាលី។

លោក Jones បានប្រាប់សន្និសីទសារព័ត៌មានថា វេទិកាដែលមានហានិភ័យនៃការបង់ប្រាក់នោះ គឺជាវេទិកាប្រព័ន្ធផ្សព្វផ្សាយសង្គមធំៗ និងម៉ាស៊ីនស្វែងរកមានមូលដ្ឋាននៅអូស្ត្រាលី ដែលមានប្រាក់ចំណូលលើសពី ២៥០លានដុល្លារ។

អូស្ត្រាលី ក្នុងឆ្នាំ២០២១ បានអនុម័តច្បាប់ដើម្បីធ្វើឱ្យក្រុមហ៊ុនបច្ចេកវិទ្យាខ្នាតយក្សរបស់សហរដ្ឋអាមេរិក ដូចជា Google របស់ Alphabet និង Meta ផ្តល់សំណងដល់ក្រុមហ៊ុនប្រព័ន្ធផ្សព្វផ្សាយសម្រាប់តំណភ្ជាប់ ដែលទាញយកអ្នកអាន និងការផ្សាយពាណិជ្ជកម្ម ទៅកាន់វេទិការបស់ពួកគេ៕