អង្គការសហប្រជាជាតិ និងដៃគូមនុស្សធម៌ កាលពីថ្ងៃពុធ បានធ្វើការអំពាវនាវសុំជំនួយថវិកាចំនួន ៤.១ ពាន់លានដុល្លារ សម្រាប់ឆ្នាំ ២០២៥ ដើម្បីជួយដល់ប្រជាជនប៉ាឡេស្ទីន ៣.៣ លាននាក់។

ការិយាល័យអង្គការសហប្រជាជាតិសម្រាប់ការសម្របសម្រួលកិច្ចការមនុស្សធម៌ បាននិយាយថា ជិត៩០ ភាគរយនៃមូលនិធិដែលត្រូវការ គឺសម្រាប់ការឆ្លើយតបផ្នែកមនុស្សធម៌ នៅក្នុងតំបន់ហ្កាហ្សា ជាមួយនឹងអ្វីដែលនៅសេសសល់ គឺស្វែងរកសម្រាប់តំបន់វេសបែង(West Bank) រួមទាំងទីក្រុងហ្ស៊េរុយសាឡឹមខាងកើតផងដែរ។

OCHA បានលើកឡើងថា៖«ល្បឿន និងទំហំនៃការសម្លាប់ និងការបំផ្លិចបំផ្លាញ គឺមិនដូចអ្វីដែលបានឃើញនៅក្នុងតំបន់ហ្កាហ្សាស្ទ្រីប ក្នុងប្រវត្តិសាស្ត្រថ្មីៗនេះទេ» ។ «ការអំពាវនាវចុងក្រោយនេះ ផ្តោតទៅលើប្រជាជនទាំងអស់នៃតំបន់ហ្កាហ្សា ប្រហែល ២,១លាននាក់ ដោយពួកគេទាំងអស់ ត្រូវការជំនួយមនុស្សធម៌ បន្ទាប់ពីអរិភាពដ៏ឃោរឃៅរយៈពេល ១៤ខែ។

ទោះជាយ៉ាងណា ក្រុមមនុស្សធម៌ បាននិយាយថា ប្រាក់ជាង ៤,១ ពាន់លានដុល្លារ ដែលត្រូវបានស្វែងរកនេះ គឺត្រូវការជាចំបាច់។ ការឆ្លើយតបផ្នែកមនុស្សធម៌ពេញលេញ នឹងត្រូវការប្រាក់ចំនួន ៦,៦ ពាន់លានដុល្លារ។

ការអំពាវនាវភ្លាមៗនេះ បង្ហាញពីការរំពឹងទុកដែលអង្គការជំនួយនានា នឹងបន្តប្រឈមមុខនឹងឧបសគ្គដែលមិនអាចទទួលយកបានលើកិច្ចប្រតិបត្តិការរបស់ពួកគេ នៅក្នុងឆ្នាំ ២០២៥ ដោយកំណត់យ៉ាងច្បាស់លាស់នូវចំនួនដែលក្រុមមនុស្សធម៌អាចផ្តល់ឲ្យបាន។