​កោះ​តៃវ៉ាន់​៖ លោកស្រី Tsai Ing-wen មេដឹកនាំ​កោះ​តៃវ៉ាន់​បាន​និយាយ​ថា ការ​គំរាម​ពី​សំណាក់​ប្រទេស​ចិន​កំពុង​កើន​ឡើងជា​រៀងរាល់ថ្ងៃ ខណៈ​ប្រធានាធិបតី​អាមេរិក​លោក Joe Biden រិះគន់​សកម្មភាព​ថ្មីៗ​របស់​ទីក្រុង​ប៉េកាំងនៅ​ច្រក​សមុទ្រ​តៃវ៉ាន់ ដែល​សកម្មភាព​ទាំងនោះ​ថា​ជា​ការ​ដាក់​សម្ពាធ​។

​លោកស្រី Tsai បាន​ប្រាប់​សារព័ត៌មាន CNN ថា កោះ​តៃវ៉ាន់​គឺជា​ខ្សែត្រៀម​ជួរមុខ​ក្នុង​ការ​ប្រយុទ្ធ​ប្រឆាំង​ដើម្បី​លទ្ធិប្រជាធិបតេយ្យ ហើយ​ថា បក្ស​កុំម្មុយនីស​ចិន​ចាំបាច់​ត្រូវ​សម្រេច​ចិត្ត​ថា ​តើ​ទំនាក់​ទំនង​បែប​ណា​ដែល​ខ្លួន​ចង់បាន​ជាមួយ​ពិភពលោក​។ លោកស្រី​បាន​និយាយ​ថា តើ​លោក Xi ចង់​បាន​ទំនាក់ទំនង​ប្រកបដោយ​សន្តិ​ភាពជា​មនុស្ស​គ្រប់រូប​ក្នុង​តំបន់​នេះ ឬ​ចង់បាន​អំណាច​ដើម្បី​ឲ្យ​គេ​គ្រប់គ្នា​ស្ដាប់​សម្ដី​របស់​លោក ឬ​ប្រទេស​ចិន​? មេដឹកនាំ​កោះ​ដែល​ចិន​អះអាង​ថា ​ជា​ដែនដី​របស់​ខ្លួន​រូប​នេះ​ក៏បាន​បញ្ជាក់​ផង​ដែរ ពី​វត្តមាន​កងទ័ព​ជំនាញ​សហរដ្ឋអាមេរិកនៅ​លើ​កោះ​នេះ ជា​លើកដំបូង​ដែល​លោកស្រី​បាន​អះអាង​ដោយ​ផ្ទាល់ ប៉ុន្តែ​លោកស្រី​បាន​បន្ថែម​ថា ចំនួន​នោះ​មិន​ច្រើន​ដូចដែល​មនុស្ស​ទូទៅ​គិត​នោះ​ទេ។

យើង​មាន​កិច្ច​សហប្រតិបត្តិការ​ទូ​លំ​ទូលាយ​ជាមួយ​សហរដ្ឋអាមេរិក ក្នុង​បំណង​បង្កើន​សមត្ថភាព​វិស័យ​ការពារ​ជាតិ​របស់​យើង​តែប៉ុណ្ណោះ។​ កាលពី​សប្ដាហ៍​មុនលោក Biden បាន​ប្រកាស​អាសន្ន​ពី​ទីក្រុង​ប៉េកាំង​ដោយ​បាន​លើក​ឡើង​ថា សហរដ្ឋអាមេរិក​មាន​ការ​តាំង​ចិត្ត​ដ៏​មុតមាំ​ដើម្បី​ជួយ​កោះ​តៃវ៉ាន់​ក្នុង​ការ​ការពារ​ខ្លួន ​ក្នុង​ករណី​មានការ​វាយប្រហារ​ពី​ប្រទេស​ចិន​៕

អត្ថបទ៖ សុខមាន