បេសកកម្មរបស់អង្គការសហប្រជាជាតិប្រចាំប្រទេសអាហ្វហ្គានីស្ថាន បាននិយាយកាលពីថ្ងៃអង្គារថា ក្រុមតាលីបង់ដែលកំពុងកាន់អំណាច បានឃាត់ខ្លួនអ្នកសារព័ត៌មានតាមអំពើចិត្តចំនួន ២៥៦ ដង ចាប់តាំងពីការកាន់កាប់របស់ពួកគេ កាលពីបីឆ្នាំមុន ហើយបានជំរុញឲ្យអាជ្ញាធរនៅទីនោះ ការពារប្រព័ន្ធផ្សព្វ    ផ្សាយ។

នៅក្នុងការឆ្លើយតបដែលភ្ជាប់មកជាមួយរបាយការណ៍ ក្រសួងការបរទេសដឹកនាំដោយតាលីបង់ បានបដិសេធថា មិនបានចាប់ខ្លួនអ្នកកាសែតទាំងនោះ ហើយបន្ថែមថា អ្នកដែលត្រូវបានចាប់ខ្លួនបានប្រព្រឹត្តបទឧក្រិដ្ឋ។

បេសកកម្មរបស់អង្គការសហប្រជាជាតិ (UNAMA) និងការិយាល័យសិទ្ធិមនុស្សរបស់អង្គការសហប្រជាជាតិ បាននិយាយនៅក្នុងសេចក្តីថ្លែងការណ៍មួយថា អ្នកសារព័ត៌មាន នៅក្នុងប្រទេសអាហ្វហ្គានីស្ថាន បានធ្វើការក្រោម «លក្ខខណ្ឌដ៏លំបាក»។

លោកស្រី Roza Otunbayeva តំណាងពិសេសរបស់លោកអគ្គលេខាធិការ អង់តូនីញ៉ូ ហ្គុយតឺរេស( Antonio Guterres) បានលើកឡើងថា៖«ជារឿយៗ ពួកគេប្រឈមមុខនឹងច្បាប់មិនច្បាស់លាស់អំពីអ្វី ដែលពួកគេអាច និងមិនអាចរាយការណ៍បាន ដោយប្រឈមនឹងហានិភ័យនៃការបំភិតបំភ័យ និងការចាប់ឃុំខ្លួនតាមអំពើចិត្ត ដោយសារការរិះគន់»។

លោកស្រី បានបន្ថែមថា៖«យើងជំរុញឲ្យអាជ្ញាធរពិតប្រាកដ ធានាសុវត្ថិភាព និងសុវត្ថិភាពរបស់អ្នកសារព័ត៌មាន និងអ្នកធ្វើការប្រព័ន្ធផ្សព្វផ្សាយទាំងអស់ នៅពេលពួកគេបំពេញភារកិច្ចរបស់ពួកគេ និងទទួលស្គាល់យ៉ាងពេញលេញនូវសារៈសំខាន់របស់ស្ត្រី ដែលធ្វើការនៅក្នុងប្រព័ន្ធផ្សព្វផ្សាយ»។