សារព័ត៌មាន Al Jazeera បានរាយការណ៍ថា រដ្ឋាភិបាលអន្តរកាលនៃប្រទេសស៊ីរី គ្រោងនឹងពន្លឿនដំណើរការនៃការដាក់ពង្រាយការល្បាតសន្តិសុខ នៅទូទាំងប្រទេស។

ប្រភពមួយនៅក្នុងនាយកដ្ឋាននយោបាយនៃក្រុមប្រឆាំងស៊ីរី ដែលបានកាន់កាប់ទីក្រុងដាម៉ាស (Damascus) និងទីក្រុងជាច្រើនទៀត ក្នុងប្រទេសនេះ កាលពីសប្តាហ៍មុន បានប្រាប់ទូរទស្សន៍ថា៖« យើងនឹងពន្លឿនការដាក់ពង្រាយការល្បាតសន្តិសុខ នៅទូទាំងប្រទេសស៊ីរី»។

លោកបានបញ្ជាក់ថា៖«អាទិភាព គឺការគ្រប់គ្រងសន្តិសុខ ហើយយើងកំពុងពង្រឹងប្រតិបត្តិការសន្តិសុខដើម្បីការពារស្ថាប័នរដ្ឋាភិបាល»។

តាមប្រភពដដែលបានឲ្យដឹងថា គោលដៅរបស់ក្រុមប្រឆាំងនេះគឺ «បង្កើតរដ្ឋថ្មី ដោយផ្អែកលើស្ថាប័នទាំងអស់ និងច្បាប់»។

អង្គភាពប្រឆាំងប្រដាប់អាវុធរបស់ស៊ីរី បានចាប់ផ្តើមការវាយលុកទ្រង់ទ្រាយធំលើកងទ័ពរដ្ឋាភិបាលនៅ ចុងខែវិច្ឆិកា។ នៅថ្ងៃទី ០៨ ខែធ្នូ ពួកគេបានចូលក្នុងក្រុងដាម៉ាស ខណៈដែលទាហានរដ្ឋាភិបាល បានដកចេញពីទីក្រុងនេះ។ លោក បាសា អាល់អាសាដ ( Bashar al-Assad) បានលាលែងពីតំណែងជាប្រធានាធិបតី ហើយបានភៀសខ្លួនចេញពីប្រទេស។ ប្រភពមួយរបស់វិមានក្រឹមឡាំង បានប្រាប់សារព័ត៌មានTASS ថា លោក អាសាដ និងគ្រួសាររបស់គាត់ គឺស្ថិតនៅក្នុងទីក្រុងមូស្គូ ហើយត្រូវបានផ្តល់សិទ្ធិជ្រកកោន នៅក្នុងប្រទេសរុស្ស៊ី ដោយហេតុផលមនុស្សធម៌។

លោក Mohammed Bashir បានប្រកាសកាលពីថ្ងៃទី ១០ ខែធ្នូថា លោកនឹងដឹកនាំគណៈរដ្ឋ          មន្ត្រីបណ្តោះអាសន្ន នៅក្នុងប្រទេសស៊ីរី។ លោក ធ្លាប់បានដឹកនាំគណៈរដ្ឋមន្ត្រីរបស់ក្រុមប្រឆាំង នៅក្នុងទីក្រុងអ៊ីតលីប (Idlib) តាំងពីខែមករា ឆ្នាំ ២០២៤។