រដ្ឋមន្ត្រីការបរទេសអាមេរិកលោក អង់តូនី ប្លីនខិន (Antony Blinken) បានប្រាប់គណៈកម្មាធិការកិច្ចការបរទេសរបស់សភាថា ការដកទាហានអាមេរិកចេញពីប្រទេសអាហ្វហ្គានីស្ថាន ក្នុងឆ្នាំ ២០២១ បានអនុញ្ញាតឲ្យទីក្រុងវ៉ាស៊ីនតោន ជួយផ្តល់ធនធានសម្រាប់តម្រូវការផ្សេងទៀត រួមទាំងនៅក្នុងប្រទេសអ៊ុយក្រែនផងដែរ។ 

នៅពេលត្រូវបានសួរអំពីអត្ថប្រយោជន៍របស់ទីក្រុងវ៉ាស៊ីនតោនពីការដកកងទ័ពនេះ លោក ប្ល៊ីនខិន បានឆ្លើយតបថា៖«វាបានផ្តល់ឲ្យយើងនូវឱកាស ដើម្បីផ្តោតនិងផ្តល់ធនធានរបស់យើងឡើងវិញចំពោះបញ្ហាប្រឈមនាពេលនេះ ពីការឈ្លានពានរបស់រុស្ស៊ីប្រឆាំងនឹងអ៊ុយក្រែន រហូតដល់បញ្ហាប្រឈមជាច្រើនដែលបង្កឡើងដោយប្រទេសចិន រហូតដល់បញ្ហាជាច្រើនទៀតជុំវិញពិភពលោក ដែលយើងអាចបញ្ចេញធនធាន បង្កើនការផ្តោតការយកចិត្តទុកដាក់ និងមានពេលធ្វើអ្វីផ្សេងទៀត។

បន្ទាប់មក លោក ប្ល៊ីនខិន ត្រូវបានសួរថាតើលោក បានឃើញទំនាក់ទំនងណាមួយរវាងការដកទ័ពអាមេ  រិកចេញពីអាហ្វហ្គានីស្ថាន និងការចាប់ផ្តើមប្រតិបត្តិការយោធាពិសេសរបស់រុស្ស៊ី ប្រមុខការទូត របស់សហរដ្ឋអាមេរិកនេះ បានឆ្លើយតបថា៖«ទេ ផ្ទុយទៅវិញ ខ្ញុំគិតថា គូប្រជែងរបស់យើង រួមទាំងរុស្ស៊ី នឹងរីករាយ ប្រសិនបើយើងធ្លាក់ចុះទ្វេដង ហើយនៅតែជាប់គាំងនៅអាហ្វហ្គានីស្ថានរយៈពេល ២០ឆ្នាំទៀតនោះ។

បន្ទាប់ពីទីក្រុងវ៉ាស៊ីនតោន បានប្រកាសនៅនិទាឃរដូវ ឆ្នាំ ២០២១ ថាខ្លួននឹងដកកងទ័ពអាមេរិកចេញពីប្រទេសអាហ្វហ្គានីស្ថាន សមាជិកក្រុមតាលីបង់ បានបើកប្រតិបត្តិការទ្រង់ទ្រាយធំមួយ ដើម្បីដណ្តើមគ្រប់គ្រងប្រទេស។ នៅថ្ងៃទី ១៥ ខែសីហា ពួកគេបានដណ្តើមយកទីក្រុងកាប៊ុល ដោយគ្មានការប្រយុទ្ធគ្នា។ ប្រធានាធិបតីអាហ្វហ្គានីស្ថាន លោក Ashraf Ghani បានចុះចេញពីតំណែង ហើយបានភៀសខ្លួនចេញពីប្រទេស។ ទាហានអាមេរិក បានចាកចេញពីអាហ្វហ្គានីស្ថាន នៅដើមខែកញ្ញា ឆ្នាំ ២០២១។