តុលាការកំពូលរបស់ប្រទេសកូរ៉េខាងត្បូង នៅថ្ងៃព្រហស្បតិ៍ (ទី១២ ខែធ្នូ) នេះ បានតម្កល់ការកាត់ទោសឲ្យជាប់ពន្ធនាគាររយៈពេល ២ឆ្នាំ ចំពោះមេដឹកនាំបក្សប្រឆាំងដ៏លេចធ្លោ គឺលោក Cho Kuk ជុំវិញបទចោទក្លែងបន្លំឯកសារសិក្សា ដើម្បីធានាដល់ការចូលរៀននៃកូនៗរបស់លោក នៅសាលាដ៏មានកេរ្តិ៍ឈ្មោះមួយ។

លោក Cho បាននាំមុខគេក្នុងកិច្ចប្រឹងប្រែង ដើម្បីចោទប្រកាន់ប្រធានាធិបតី លោក Yoon Suk Yeol បន្ទាប់ពីមានការដាក់ច្បាប់អាជ្ញាសឹករយៈពេលខ្លីរបស់លោក កាលពីសប្តាហ៍មុន ដែលបានរុញប្រទេសប្រកាន់លទ្ធិប្រជាធិបតេយ្យមួយនេះធ្លាក់ចូលទៅក្នុងភាពវឹកវរផ្នែកនយោបាយ។

ដោយតម្កល់ការសម្រេចរបស់តុលាការជាន់ទាប តុលាការកំពូលរបស់ប្រទេសកូរ៉េខាងត្បូង បានឲ្យដឹងនៅក្នុងសេចក្តីថ្លែងការណ៍ថា៖ «តុលាការកំពូលរកឃើញថា ការចោទប្រកាន់ពីបទរារាំងអាជីវកម្ម ហើយនិងការក្លែងបន្លំឯកសារសាធារណៈ និងឯកជន ប្រឆាំងនឹងចុងចោទ គឺត្រឹមត្រូវស្របតាមច្បាប់»។

លោក Cho ដែលធ្លាប់ជាអ្នកសិក្សាដ៏មានកេរ្តិ៍ឈ្មោះ និងជាជំនួយការរបស់អតីតប្រធានាធិបតី លោក Moon Jae-in ធ្លាប់ត្រូវបានចាត់ទុកថា ជាបុគ្គលលេចធ្លោផ្នែកនយោបាយ និងជាបេក្ខជនដ៏មានសក្តានុពលម្នាក់ ក្នុងការបន្តតំណែងពីមេរបស់ខ្លួន។ លោកត្រូវបានតែងតាំងឲ្យដឹកនាំក្រសួងយុត្តិធម៌ដ៏មានឥទ្ធិពលនៅឆ្នាំ២០១៩។

ប៉ុន្តែមិនយូរប៉ុន្មាន លោកបានជាប់ពាក់ព័ន្ធនឹងរឿងអាស្រូវ ជុំវិញការសិក្សានៃកូនៗរបស់លោក ដោយត្រូវបានចោទថា បានក្លែងបន្លំឯកសារសិក្សា សម្រាប់កូនប្រុស-ស្រី ដើម្បីផ្តល់គុណប្រយោជន៍ឲ្យពួកគេបានចូលរៀន នៅមហាវិទ្យាល័យ និងបញ្ចប់ការសិក្សា៕