អ្នកជំនួញឥណ្ឌាម្នាក់ដែលបានជាប់ខ្លួនក្នុងប្រទេសស៊ីរីញាំញីដោយសារជម្លោះ បានវិលត្រឡប់ទៅកាន់រដ្ឋធានីញូវដែល្លីវិញហើយ នៅថ្ងៃព្រហស្បតិ៍នេះ ចេញពីទីក្រុងបេរូត ប្រទេសលីបង់ ជាទីដែលឥណ្ឌាបានជម្លៀសជនជាតិរបស់ខ្លួន ស្របពេលវិបត្តិកំពុងកើតឡើង ។

លោក Ravi Bhushan ដែលបានធ្វើដំណើរទៅកាន់ប្រទេសស៊ីរី សម្រាប់ជំនួបធុរកិច្ចរបស់លោក និយាយថា មាននូវការផ្ទុះអាវុធច្រើនណាស់នៅតាមដងផ្លូវ ។

ក្រសួងការបរទេសឥណ្ឌា និយាយថា ឥណ្ឌា បានជម្លៀសពលរដ្ឋរបស់ខ្លួនចំនួន ៧៥នាក់ ទៅកាន់ទីក្រុងបេរូត ក្នុងនោះលោក Bhushan គឺជាមនុស្សដំបូងគេដែលត្រូវបានវិលត្រឡប់ទៅកាន់ទីក្រុងដែល្លីវិញ ។

ក្រុមអ៊ិស្លាមរបស់មេដឹកនាំឧទ្ទាម Ahmad al-Sharaa កំពុងបង្កើនអំណាចរបស់ខ្លួនលើរដ្ឋស៊ីរី ដូចជាពេលដែលពួកគេរូបអូសប្រទេសមួយនេះ ជាមួយនឹងការដាក់ពង្រាយនគរបាល លើកបន្តុបរដ្ឋាភិបាលស្តីទី និងជួបជាមួយប្រេសិតពិសេសបរទេស ជាហេតុនាំឲ្យកើតមានក្តីកង្វល់ថាតើក្រុមគ្រប់គ្រងថ្មីនៅរដ្ឋធានីដាម៉ាស់មួយនេះ មានបំណងធ្វើបែបណា ។

ចាប់តាំងពីក្រុមឧទ្ទាម Hayat Tahrir al-Sham របស់លោក Sharaa ទម្លាក់លោក Bashar al-Assad ចេញពីអំណាចកាលពីថ្ងៃអាទិត្យរហូតមក ការិយាធិបតេយ្យរបស់ពួកគេ បានផ្លាស់ប្តូរមកកាន់ទីស្នាក់ការកណ្តាលរដ្ឋាភិបាលស៊ីរី ស្ថិតក្នុងទីក្រុងដាម៉ាស់ ។

ដោយឡែក ការតែងតាំងលោក Mohammed al-Bashir ដែលជាប្រមុខរដ្ឋក្នុងតំបន់នៅខេត្ត Idlib ជានាយករដ្ឋមន្រ្តីថ្មីបណ្តោះអាសន្នស៊ីរីកាលពីថ្ងៃចន្ទ បានបញ្ជាក់ពីស្ថានការរបស់ក្រុមមួយនេះថាជា ក្រុមប្រដាប់អាវុធដ៏ខ្លាំងក្លាបំផុត ដែលបានធ្វើសង្រ្គាមអស់រយៈពេលជាង ១៣ឆ្នាំមកហើយ ដើម្បីបញ្ចប់ការគ្រប់គ្រងប្រើកណ្តាប់ដៃដែករបស់លោក Assad ៕