មន្ទីរបច្ចកោណ និយាយថា សហរដ្ឋអាមេរិក ស្វាគមន៍សេចក្តីអត្ថាធិប្បាយកាលពីពេលថ្មីៗរបស់មេដឹកនាំឧទ្ទាមស៊ីរី ពីការធានាសុវត្ថិភាពតំបន់អាវុធគីមីដ៏មានសក្តានុពល ប៉ុន្តែនៅរង់ចាំមើលសិន ថាតើពួកគេនឹងចាត់វិធានការតាមវិធីណា ។

អ្នកនាំពាក្យមន្ទីរបច្ចកោណអ្នកស្រី Sabrina Singh និយាយប្រាប់ក្រុមអ្នកសារព័ត៌មានថា ពួកយើងស្វាគមន៍វោហាសាស្រ្តបែបនេះ ប៉ុន្តែវិធានការត្រូវធ្វើតាមពាក្យសម្តីផងដែរ ។

អ្នកស្រី Sabrina និយាយថា ក្នុងលក្ខខណ្ឌដែលមេដឹកនាំឧទ្ទាមនិយាយពីអាវុធគីមី ទាំងនេះ គឺជារឿងល្អ ។ ពួកយើងសូមស្វាគមន៍វោហាសាស្រ្តមួយនេះ ប៉ុន្តែពាក្យសម្តីត្រូវភ្ជាប់ជាមួយទង្វើផងដែរ ។ ដូច្នេះហើយ ពួកយើងនឹងបន្តធ្វើការជាមួយក្រុមដែលពួកយើងមានទំនាក់ទំនងជាមួយ ។

អ្នកស្រីបន្តថា ជាថ្មីម្តងទៀត ការផ្តោតសំខាន់របស់ពួកយើង គឺអាវុធគីមីទាំងនេះ មិនត្រូវធ្លាក់ទៅក្នុងកណ្តាប់ដៃមនុស្សខុសនោះទេ ។

សូមបញ្ជាក់ថា ការវាយប្រហារអាវុធគីមី បានកើតឡើងតាមតំបន់ផ្សេងៗជាច្រើននៅក្នុងប្រទេសស៊ីរី រួមទាំងទីក្រុង Khan al-Assal, Jobar, Saraqib, Ashrafiyat Sahnaya, Kafr Zita, Talmenes, Sarmin និងទីក្រុង Douma ។

ការវាយប្រហារស្លាប់មនុស្សច្រើនបំផុត បានកើតឡើងនៅខែសីហា ឆ្នាំ ២០១៣ ដែលជាការវាយប្រហារដោយសារធាតុគីមីសារីននៅទីក្រុង Ghouta ដោយសម្លាប់មនុស្សចន្លោះពី ២៨១នាក់ និង ១.៧២៩នាក់ ហើយមនុស្សជាង ៣.៦០០នាក់ផ្សេងទៀត រងរបួស ៕