ទីប្រឹក្សាសន្តិសុខជាតិសហរដ្ឋអាមេរិកលោក Jake Sullivan មាននូវជំនួបជាមួយនាយករដ្ឋមន្រ្តីអ៊ីស្រាអែលលោក Benjamin Netanyahu នៅក្នុងទីក្រុងហ្សេរុយសាឡឹម នាថ្ងៃព្រហស្បតិ៍នេះ ស្របពេលអ៊ីស្រាអែល និងក្រុមហាម៉ាស់ប៉ាឡេស្ទីន បង្ហាញសញ្ញានៃកិច្ចខិតខំថ្មី ដើម្បីជំរុញឲ្យមានកិច្ចព្រមព្រៀងបទឈប់បាញ់ ផ្អាកសង្រ្គាមនៅតំបន់ហ្កាហ្សា និងប្រគល់ចំណាប់ថ្នូរយ៉ាងហោច ១០០នាក់ដល់អ៊ីស្រាអែលវិញ ។

មន្រ្តីការទូតលោកខាងលិចមួយរូបនៅក្នុងតំបន់មជ្ឈិមបូព៌ា និយាយថា កិច្ចព្រមព្រៀងរបស់អ៊ីស្រាអែលជាមួយក្រុមជីវពលហាម៉ាស់ ចាប់ផ្តើមឡើងវិញហើយ ប៉ុន្តែទំនងជាមានដែនកំណត់ ពាក់ព័ន្ធនឹងការដោះលែងចំណាប់ថ្នូរមួយក្តាប់តូចប៉ុណ្ណោះ ហើយនិងការផ្អាកសង្រ្គាមរយៈពេលខ្លី ។

លោក Basem Naim គឺជាមន្រ្តីជាន់ខ្ពស់មួយរូបរបស់ក្រុមហាម៉ាស់ និយាយថា រាល់មន្រ្តីសហរដ្ឋអាមេរិក ត្រូវតែដាក់សំពាធពិតប្រាកដ ដើម្បីធ្វើឲ្យលោក Netanyahu និងរដ្ឋាភិបាលរបស់លោក ទទួលយកសំណើបទឈប់បាញ់កាលពីថ្ងៃទី ២ ខែកក្កដារបស់សហរដ្ឋអាមេរិក ហើយនិងសេចក្តីសម្រេចរបស់អង្គការសហប្រជាជាតិ(UN) ដែលក្រុមហាម៉ាស់និយាយថា ពួកគេមួយគត់ដែលយល់ព្រមទទួលយក ។

មន្រ្តីសហរដ្ឋអាមេរិកមួយរូប ដែលសុំមិនបញ្ចេញឈ្មោះ និយាយថា ដំណើរទស្សនកិច្ចរបស់លោក Sullivan មិនមែនមានន័យថា ពួកយើងជិតឈានដល់ការបញ្ចប់កិច្ចព្រមព្រៀងនោះទេ ឬមានអ្វីមួយដែលពួកគេអាចចាក់សោរជាប់នោះទេ តែផ្ទុយទៅវិញ គោលបំណងរបស់វាគឺបោះជំហានទៅមុខ តាមដែលអាចធ្វើទៅបាន ៕