ប្រធានាធិបតីជាប់ឆ្នោតរបស់សហរដ្ឋអាមេរិក លោក Donald Trump បានរិះគន់ការប្រើប្រាស់មីស៊ីលដែលផ្គត់ផ្គង់ដោយសហរដ្ឋអាមេរិករបស់អ៊ុយក្រែនសម្រាប់ការវាយប្រហារយ៉ាងជ្រៅទៅក្នុងទឹកដីរុស្ស៊ីនៅក្នុងបទសម្ភាសន៍របស់ទស្សនាវដ្តី Time ដែលបានចេញផ្សាយកាលពីថ្ងៃព្រហស្បតិ៍សប្ដាហ៍នេះ ជាការលើកឡើងដែលបង្ហាញថាលោកអាចផ្លាស់ប្តូរគោលនយោបាយរបស់សហរដ្ឋអាមេរិកចំពោះអ៊ុយក្រែន។

លោក Trump បាននិយាយនៅក្នុងបទសម្ភាសន៍មួយដែលនឹងត្រូវបានគេដាក់ឈ្មោះជា បុគ្គលល្បីប្រចាំឆ្នាំ(Person of the Year)របស់ទស្សនាវដ្តីTime ថា អ្វីដែលកំពុងកើតឡើងគឺជារឿងផ្ដេសផ្ដាស់ខ្លាំងណាស់។ខ្ញុំមិនយល់ស្របដាច់ខាតចំពោះការបញ្ជូនមីស៊ីលរាប់រយម៉ាយចូលទៅក្នុងប្រទេសរុស្ស៊ី។ហេតុអ្វីយើងធ្វើដូច្នេះ? បែបនេះ បានត្រឹមតែដុតបន្ថែមភ្លើងសង្រ្គាមកាន់តែខ្លាំងទៅវិញទេ។

លោកប្រធានាធិបតី Joe Biden កាលពីខែមុនបានលុបចោលបម្រាមរបស់សហរដ្ឋអាមេរិកលើអ៊ុយក្រែន ដោយបើកភ្លើងខៀវឲ្យបញ្ជូនមីស៊ីលរយៈចម្ងាយឆ្ងាយឲ្យទៅអ៊ុយក្រែនសម្រាប់ការវាយប្រហារជ្រៅក្នុងប្រទេសទឹកដីរុស្ស៊ី ជាការប៉ុនប៉ងចុងក្រោយរបស់លោកក្នុងការជំរុញទីក្រុង Kyiv ក្នុងសមរភូមិរបស់ខ្លួនទប់ទល់កម្លាំងរបស់រុស្ស៊ី។

ការសម្រេចចិត្តនេះធ្វើឡើងបន្ទាប់ពីមានការអង្វរពីប្រធានាធិបតីអ៊ុយក្រែន Volodymyr Zelenskiy។ សេតវិមានបានលើកឡើងពីការដាក់ពង្រាយទាហានកូរ៉េខាងជើងចំនួន១៥.០០០នាក់នៅតាមសមរភូមិថាជាហេតុផលចម្បងដែលធ្វើឱ្យលោក Biden ផ្លាស់ប្តូរចិត្ត។

លោក Trump បាននិយាយថាលោកចង់បញ្ចប់សង្រ្គាមដែលមានរយៈពេលជិត ៣ ឆ្នាំឲ្យបានឆាប់រហ័សបំផុត ប៉ុន្តែលោកពុំបានបង្ហើបព័ត៌មានលម្អិតទេ។លោកបានប្រាប់ទស្សនាវដ្តី Time ថាលោកមាន"ផែនការល្អណាស់"ដើម្បីជួយប៉ុន្តែប្រសិនបើលោកបង្ហាញឥឡូវនេះ នោះអាចនឹងក្លាយជាផែនការគ្មានតម្លៃ៕