កងទ័ពអ៊ីស្រាអែល ដែលគាំទ្រដោយគ្រឿងចក្រធុនធ្ងន់ និងរថយន្តយោធា បានធ្វើប្រតិបត្តិការ កាលពីថ្ងៃព្រហស្បតិ៍ ទី១២ ខែធ្នូ នៅក្នុងតំបន់ទ្រនាប់រវាងប្រទេសស៊ីរី និងតំបន់ខ្ពង់រាប Golan ដែលកាន់កាប់ដោយអ៊ីស្រាអែល ប៉ុន្មានថ្ងៃបន្ទាប់ពីរដ្ឋាភិបាលរបស់ប្រធានាធិបតីស៊ីរី លោក Bashar al-Assad បានដួលរលំ។

នៅក្នុងសេចក្តីថ្លែងការណ៍ ដែលបានចេញផ្សាយកាលពីថ្ងៃព្រហស្បតិ៍ ដោយការិយាល័យនាយករដ្ឋមន្ត្រីអ៊ីស្រាអែល លោក Benjamin Netanyahu បាននិយាយថា ការដួលរលំនៃរបបស៊ីរី បានបង្កើតកន្លែងទំនេរនៅតាមព្រំដែនអ៊ីស្រាអែល និងនៅក្នុងតំបន់ទ្រនាប់ ខណៈអ៊ីស្រាអែលនឹងមិនអនុញ្ញាតឱ្យក្រុមជីហាដ បំពេញទីទំនេរនោះឡើយ។ នោះហើយជាមូលហេតុដែលកងកម្លាំងអ៊ីស្រាអែល បានចូលទៅក្នុងតំបន់ទ្រនាប់ និងបានដណ្តើមយកការគ្រប់គ្រងទីតាំងយុទ្ធសាស្ត្រនៅជិតព្រំដែនអ៊ីស្រាអែល។

សេចក្តីថ្លែងការណ៍ បាននិយាយបន្ថែមថា ការដាក់ពង្រាយនេះ គឺជាការដាក់ពង្រាយបណ្តោះអាសន្នរហូតដល់កម្លាំងដែលប្តេជ្ញាចិត្តចំពោះកិច្ចព្រមព្រៀងឆ្នាំ១៩៧៤ អាចត្រូវបានបង្កើតឡើង ហើយសន្តិសុខនៅតាមព្រំដែន អាចត្រូវបានធានា។