ប្រធានាធិបតីសហរដ្ឋអាមេរិក លោក Joe Biden កាលពីថ្ងៃព្រហស្បតិ៍ បានលើកលែងទោសដល់អ្នកទោស៣៩នាក់ និងបានបន្ថយទោសដល់មនុស្សប្រមាណ១.៥០០នាក់ ដោយបង្កើតកំណត់ត្រានៅថ្ងៃតែមួយ សម្រាប់ចំណាត់ការលើកលែងទោស។

យោងតាមឯកសាររបស់សេតវិមាន បានឲ្យដឹងថា លោកប្រធានាធិបតី Joe Biden បានប្រកាសថា លោកកំពុងផ្តល់ការលើកលែងទោសដល់ពលរដ្ឋអាមេរិកប្រមាណ១.៥០០នាក់ ជាចំនួនច្រើនបំផុតមិនធ្លាប់មាននៅក្នុងថ្ងៃតែមួយ ដែលបានបង្ហាញពីការស្តារនីតិសម្បទាដោយជោគជ័យ និងការប្តេជ្ញាចិត្តយ៉ាងមុតមាំ ក្នុងការធ្វើឱ្យសហគមន៍របស់ពួកគេកាន់តែមានសុវត្ថិភាព។ អ្នកទោសជិត១.៥០០នាក់ ដែលបានទទួលការបន្ថយទោស ជាអ្នកដែលបានជាប់ទោសនៅក្នុងលំនៅឋានយ៉ាងហោចណាស់មួយឆ្នាំ ក្នុងអំឡុងពេលជំងឺរាតត្បាតកូវីដ-១៩។

សេតវិមាន និយាយថា លោក Biden ក៏បានលើកលែងទោសបុគ្គលចំនួន៣៩នាក់ ដែលត្រូវបានកាត់ទោសពីបទឧក្រិដ្ឋកម្មអហិង្សា។ ឧក្រិដ្ឋកម្មអហិង្សា តែងតែរួមបញ្ចូលបទល្មើសគ្រឿងញៀន ការក្លែងបន្លំ ឬចោរកម្ម។

លោក Biden និយាយថា ក្នុងនាមលោកជាប្រធានាធិបតី លោកមានឯកសិទ្ធិដ៏អស្ចារ្យក្នុងការពង្រីកសេចក្តីមេត្តា ដល់មនុស្ស ដែលបានបង្ហាញវិប្បដិសារី និងការកែខ្លួនវិញ ផ្តល់ឱកាសសម្រាប់ពលរដ្ឋអាមេរិកក្នុងការចូលរួមក្នុងជីវិតប្រចាំថ្ងៃ និងរួមចំណែកដល់សហគមន៍របស់ពួកគេ ព្រមទាំងមានចំណាត់ការដើម្បីដកចេញភាពខុសគ្នានៃការកាត់ទោសចំពោះជនល្មើសអហិង្សា ជាពិសេសអ្នកទាំងឡាយដែលត្រូវបានកាត់ទោសពីបទល្មើសគ្រឿងញៀន។