កំពង់ធំ៖ មន្ទីរពាណិជ្ជកម្មខេត្តកំពង់ធំ ដឹកនាំកសិករចុះទស្សនកិច្ចសិក្សា ផ្លាស់ប្តូរបទពិសោធន៍ដាំដុះបន្លែក្នុងគម្រោងជំរុញទីផ្សារសម្រាប់កសិកម្មខ្នាតតូច (អេមស៍) និងស្វែងរកទីផ្សារបន្ថែម។

នៅថ្ងៃទី២៨ ខែតុលា ឆ្នាំ២០២១, មន្ទីរពាណិជ្ជកម្មខេត្តកំពង់ធំ ដឹកនាំតំណាំងកសិករចំនួនប្រាំក្រុមផលិតចុះទស្សនកិច្ចសិក្សាបផ្លាស់ប្តូរបទពិសោធន៍ដាំដុះ និងបង្កើតទីផ្សារ។ លោក ហៀវ វណ្ណា ប្រធានមន្ទីរពាណិជ្ជកម្មខេត្តកំពង់ធំ លើកឡើងថា សកម្មភាពនៃការចុះទស្សនកិច្ចសិក្សារបស់តំណាងកសិករក្នុងក្រុមផលិត គឺធ្វើឡើងក្នុងគោលបំណងផ្តល់ឱកាសដល់កសិករបានសិក្សាស្វែងយល់បន្លែមពីវិធីដាំដុះ ពីការជ្រើសរើសពូជ ការកែលម្អរដី និងបង្កើតទីផ្សារបន្លែមផងដែរ។ លោកបន្តថា ដំណើរទស្សនៈកិច្ចនេះ មានការចូលរួមពីអាជ្ញាធរភូមិ-ឃុំ និងតំណាងក្រុមផលិតចំនួន ០៥ក្រុមផលិត(ក្រុមបន្លែសេរីវង្ស,ល្វាជោម,អូរំដេង,ប្រម៉ាត់ដី និងក្រុមផលិតកំពង់សំរោង)សរុប ៣៦នាក់ ស្រី ១៥នាក់ បានទទួលបទពិសោធន៍លើខ្សែច្រវាក់តម្លៃបន្លែ ដែលស្ថិតនៅក្នុងក្រុមផលិតចម្រើនជីវភាព ភូមិ អណ្តូងពោធិ៍ ឃុំអណ្តូងពោធិ៍ ស្រុកតាំងគោក ខេត្តកំពង់ធំ។

 ជាមួយនេះដែរលោកស្រី ឡុញ ធារ៉ា ប្រធានសហគមន៍ចម្រើនជីវភាព លើកឡើងថា ក្រៅពីតួនាទីជាប្រធានសហគមន៍លោកស្រីគឺអ្នកប្រមូលទិញបន្លែពីកសិករក្នុងក្រុម ដើម្បីនាំទៅលក់លើទីផ្សារ ក្នុងស្រុក។ ការធ្វើដូច្នេះ ដើម្បីប្រាកដថា បន្លែដែលបងប្អូនកសិករដាំក្នុងគម្រោង ឬសហគមន៍ចម្រើនជីវភាព មានទាំងគុណភាព និងតម្លៃសមរម្យ។

 លោក ស្រី ស៊ីថា ប្រធានសហគមន៍បុស្សម្កាក់ ស្ថិតក្នុងស្រុកកំពង់ស្វាយ ខេត្តកំពង់ធំ លើកឡើងដែរថា ដំណើរទស្សនៈកិច្ចផ្លាស់ប្តូរបទពិសោធន៍នេះ បានទទួលចំណេះដឹងថ្មីៗ ពីការផលិតកម្មបន្លែតាមបច្ចេកទេស យល់ដឹងពីការរៀបចំដី,ការជ្រើសរើសពូជបន្លែ,អាយុកាលបន្លែក្នុងការប្រើប្រាស់ថ្នាំ,ការរៀបចំដី, ការៀបចំតប្រព័ន្ធទ្រីប ការរៀបចំជីកំប៉ុសធម្មជាតិ យល់ដឹងបន្ថែមពីការថែរទាំដំណាំនៅពេលមានជំងឺ យល់ដឹងបន្ថែមពីដំណើរការផលិតកម្មបន្លែ( ស្ពៃ,សណ្តែកគួរ,ត្រសក់ទ្រើង,ដំឡូងជ្វា,ប៉េង់ប៉ោះឈឺរី) ជាពិសេសនោះកសិករយល់ដឹងបន្ថែមពីដំណោះស្រាយបញ្ហាទីផ្សារ ការរៀបចំផែនការផលិតសម្រាប់ផ្គត់ផ្គងដល់ផ្សារទំនើប និងការអនុវត្តន៍ទីផ្សារកិច្ចសន្យាទិញ-លក់ជាមួយអ្នកប្រមូលទិញជាដើម។

លោកបន្ថែមថា កសិករក្នុងសហគមន៍របស់លោកមានកសិករសរុបចំនួន៨៣គ្រួសារ ដែលកសិករទាំងអស់ដាំដុះភាគច្រើន គឺប្រភេទបន្លែផ្លែ និងបន្តនាំទៅកាន់ទីផ្សារដោយខ្លួនឯង! ប៉ុន្តែចំណុចដែលសហគមន៍របស់លោកផ្តោតសំខាន់កន្លងមក គឺក្រុមកសិករតែងតែផ្តល់បទពិសោធន៍ថ្មីទៅវិញទៅមកដែលធ្វើកសិករមានចំណេះដឹងបន្ថែមក្នុងដាំដុះទទួលបានភាពជោគជ័យ។