ក្រុមមនុស្សធម៌របស់អង្គការសហប្រជាជាតិ បាននិយាយកាលពីថ្ងៃព្រហស្បតិ៍ថា ប្រជាជនជាង ១,១លាននាក់ បានភៀសខ្លួនចេញពីផ្ទះសម្បែងរបស់ពួកគេ នៅទូទាំងប្រទេសស៊ីរី ចាប់តាំងពីអរិភាពថ្មីៗនេះ បានផ្ទុះឡើង កាលពី ២សប្តាហ៍មុននេះ ចំពេលមានសេចក្តីរាយការណ៍អំពីកង្វះខាតស្បៀងអាហារ និងប្រេងឥន្ធនៈ។

ការិយាល័យអង្គការសហប្រជាជាតិសម្រាប់ការសម្របសម្រួលកិច្ចការមនុស្សធម៌ (OCHA) បានឲ្យដឹងថា UN និងដៃគូរបស់ខ្លួនបន្តសកម្មភាពមនុស្សធម៌ ដូចដែលស្ថានភាពសន្តិសុខអនុញ្ញាត ដោយមានដៃគូមួយចំនួន ដែលកំពុងប្រតិបត្តិការ ក្នុងសមត្ថភាពមានកំណត់ នៅក្នុងទីក្រុង Damascus, Tartous, Latakia និង Raqqa ។ អង្គការពិភពលោកនេះ កំពុងតាមដានស្ថានការណ៍នេះ យ៉ាងដិតដល់។

ការិយាល័យ បាននិយាយថា នៅភាគពាយព្យនៃប្រទេសស៊ីរី កង្វះម្សៅ និងឥន្ធនៈ បានធ្វើឲ្យ ហាងនំ ជាច្រើននៅក្នុងទីក្រុងអាឡិបប៉ូ ត្រូវបិទ។ ការផ្គត់ផ្គង់បន្លែមានកំណត់ និងមានការដាច់ចរន្តអគ្គិសនីនៅតាមសង្កាត់មួយចំនួន។ ចំណែកតម្លៃប្រេងឥន្ធនៈ នៅតែខ្ពស់។

OCHA បានបន្ថែមថា អរិភាពនៅជិតទំនប់ Tishreen នៅក្នុងខេត្តអាឡិបប៉ូ បានបន្តធ្វើឲ្យដាច់ចរន្តអគ្គិសនី ចាប់តាំងពីថ្ងៃអង្គារ ដោយបានធ្វើឲ្យប៉ះពាល់ដល់មនុស្សជាង ៤០០.000 នៅក្នុងតំបន់មួយចំនួនដូចជាទីក្រុង Menbij និងទីក្រុង Kobani ដែលរំខានដល់ការទទួលបានទឹក និងសេវាសំខាន់ៗផ្សេងទៀត។

ទោះបីជាមានបញ្ហាប្រឈម និងសុវត្ថិភាពក៏ដោយ អង្គការសហប្រជាជាតិ និងដៃគូ បានផ្តល់ស្បៀងអាហារដល់មនុស្សជាង ៧០០.000នាក់ នៅភាគពាយព្យនៃប្រទេសស៊ីរី ចាប់តាំងពីការកើនឡើងនៃអរិភាពនេះ។