អនុរដ្ឋមន្ត្រីការបរទេសរុស្ស៊ី លោក Mikhail Bogdanov បាននិយាយកាលពីថ្ងៃព្រហស្បតិ៍ថា ប្រទេសរុស្ស៊ីសង្ឃឹមថា នឹងរក្សាមូលដ្ឋានយោធារបស់ខ្លួន នៅក្នុងប្រទេសស៊ីរី ខណៈដែលពួកវាទាំងនោះ មានសារៈសំខាន់ ក្នុងការប្រយុទ្ធប្រឆាំងនឹងអំពើភេរវកម្ម។

ទីភ្នាក់ងារសារព័ត៌មានរដ្ឋ RIA បានរាយការណ៍ដោយបានដកស្រង់សម្តីលោក Bogdanovថា៖«ខ្ញុំគិតថាមានកិច្ចព្រមព្រៀងទូទៅ ដែលការប្រយុទ្ធប្រឆាំងនឹងភេរវកម្ម និងក្រុម IS មិនទាន់ចប់ទេ ការងារនេះ ទាមទារឲ្យមានកិច្ចខិតខំប្រឹងប្រែងរួមគ្នា។ ក្នុងន័យនេះ វត្តមានរបស់យើង បានដើរតួយ៉ាងសំខាន់ ក្នុងការប្រយុទ្ធប្រឆាំងនឹងអំពើភេរវកម្មអន្តរជាតិ»។ 

អ្នកការទូតរុស្ស៊ីរូបនេះ បានបន្ថែមថា ទីក្រុងមូស្គូ បានបង្កើតទំនាក់ទំនងជាមួយគណៈកម្មាធិការនយោបាយនៃក្រុម Hayat Tahrir al-Sham (HTS) របស់ប្រទេសស៊ីរី ហើយបានពិភាក្សាអំពីបញ្ហាធានាសន្តិសុខរបស់បេសកកម្មការទូតរុស្ស៊ី និងពលរដ្ឋ នៅក្នុងប្រទេសនេះ។

អ្នកនាំពាក្យរបស់លោក  បាននិយាយកាលពីថ្ងៃព្រហស្បតិ៍ថា អគ្គលេខាធិការអង្គការសហប្រជាជាតិលោក អង់តូនីញ៉ូ ហ្គុយតឺរេស (Antonio Guterres) «មានការព្រួយបារម្ភយ៉ាងខ្លាំង» ចំពោះការរំលោភនាពេលថ្មីៗនេះ និងដ៏ទូលំទូលាយទៅលើអធិបតេយ្យភាព និងបូរណភាពទឹកដីរបស់ប្រទេសស៊ីរី ដោយជំរុញឲ្យភាគីនានាកាត់បន្ថយអំពើហិង្សា នៅទូទាំងប្រទេសនេះ។

លោក Stephane Dujarric អ្នកនាំពាក្យរបស់ប្រមុខអង្គការសហប្រជាជាតិ បានថ្លែងនៅទីសន្និសីទ    សារព័ត៌មានប្រចាំថ្ងៃថា៖«លោកអគ្គលេខាធិការ មានការព្រួយបារម្ភជាពិសេសចំពោះការវាយប្រហារតាមផ្លូវអាកាសរាប់រយលើករបស់អ៊ីស្រាអែលទៅលើទីតាំងជាច្រើន នៅក្នុងប្រទេសស៊ីរី ហើយបានសង្កត់ធ្ងន់    លើតម្រូវការបន្ទាន់ដើម្បីកាត់បន្ថយអំពើហិង្សាលើគ្រប់កន្លែងទាំងអស់ នៅទូទាំងប្រទេស»។