ប្រធានាធិបតីអាមេរិក លោក Joe Biden កាលពីថ្ងៃព្រហស្បតិ៍ (ទី១២ ខែធ្នូ) បានចេញផ្សាយយុទ្ធសាស្រ្តដែលរង់ចាំជាយូរមកហើយ ដើម្បីទប់ស្កាត់ការស្អប់ខ្ពើមប្រឆាំងនឹងជនមូស្លីម និងអារ៉ាប់ ដែលបានកើនឡើងយ៉ាងខ្លាំងក្លា ចាប់តាំងពីការចាប់ផ្តើមនៃសង្រ្គាមអ៊ីស្រាអែល-ហ្កាហ្សា ដោយអំពាវនាវឲ្យបន្តការងារជាបន្ទាន់ ដើម្បីកាត់បន្ថយការរើសអើង និងការលម្អៀង។

ឯកសារដែលមានកម្រាស់ ៦៤ទំព័រនេះ កើតឡើងប៉ុន្មានសប្តាហ៍មុនពេលចូលកាន់តំណែងរបស់អតីតប្រធានាធិបតី លោក Donald Trump ដែលបានដាក់បម្រាមដល់ការធ្វើដំណើររបស់ប្រជាជនមកពីប្រទេសមូស្លីមភាគច្រើន ក្នុងអាណត្តិដំបូងរបស់លោក ដែលលោក Biden បានលុបចោលនៅថ្ងៃចូលកាន់តំណែងដំបូង។

នេះឆ្លុះបញ្ចាំងពីយុទ្ធសាស្រ្តដ៏ទូលំទូលាយមួយ ក្នុងការប្រយុទ្ធនឹងទង្វើប្រឆាំងជនជាតិជ្វីហ្វនិយម ដែលចេញផ្សាយដោយសេតវិមាន នៅក្នុងខែកញ្ញាឆ្នាំ២០២៣ ហើយកើតឡើងជាងមួយឆ្នាំ ក្រោយការស្លាប់របស់ក្មេងប្រុសអាយុ ៦ឆ្នាំ ឈ្មោះ Wadea Al-Fayoume បន្ទាប់ពីត្រូវបានចាក់ដោយបុរសម្នាក់ដែលបានកំណត់គោលដៅលើក្មេងនោះ និងម្តាយរបស់ក្មេង ដោយសារតែពួកគេជាជនជាតិអាមេរិកាំងដើមកំណើតប៉ាឡេស្ទីន។

នៅក្នុងពាក្យផ្ដើមដំបូងនៃយុទ្ធសាស្រ្តនេះ លោក Biden បានហៅការវាយប្រហារលើក្មេងប្រុស នៅទីក្រុង Chicago និងម្តាយរបស់ក្មេងថា ជា «ទង្វើដ៏សាហាវ» ហើយបានកត់សម្គាល់ពីការកើនឡើងនូវឧក្រិដ្ឋកម្មស្អប់ខ្ពើមប្រឆាំងនឹងជនមូស្លីម និងអារ៉ាប់ ការរើសអើង ហើយនិងការសម្លុតកំហែងដែលលោកហៅថា ជាទង្វើខុសខ្គង និងមិនអាចទទួលយកបាន។

លោកបានសរសេរថា៖ «ប្រជាជនម៉ូស្លីម និងជនជាតិអារ៉ាប់ សមនឹងរស់នៅប្រកបដោយសេចក្តីថ្លៃថ្នូរ និងទទួលបានសិទ្ធិគ្រប់បែបយ៉ាងពេញលេញ រួមជាមួយជនជាតិអាមេរិកទាំងអស់។ គោលនយោបាយដែលនាំឲ្យមានការរើសអើងប្រឆាំងនឹងសហគមន៍ទាំងមូល គឺជាទង្វើខុសឆ្គង ហើយមិនធ្វើឲ្យយើងមានសុវត្ថិភាពនោះទេ»៕