​អាមេរិក៖ តំណាង​ពាណិជ្ជកម្ម​អាមេរិក​លោកស្រី Katherine Tai បាន​និយាយ​កាលពី​ថ្ងៃ​ព្រហស្បតិ៍ថា ការចូលរួម​របស់លោក​ស្រី​ជាមួយ​ប្រទេស​ចិន​គឺ​សំដៅ​កាត់បន្ថយ​កំដៅ​នៃ​ទំនាក់ទំនង​ពាណិជ្ជកម្ម ​រវាង​ប្រទេស​ដែលមាន​សេដ្ឋកិច្ច​ធំជាងគេ​ទាំង២ ​ដែល​បាន​ឡើង​កំដៅ​យ៉ាងខ្លាំង​។​

​ថ្លែង​នៅក្នុង​កិច្ចប្រជុំ​មួយ​របស់​ក្រុម​ប្រឹក្សាជាតិ National Chicken Council លោកស្រី Tai បាន​និយាយថា ទំនាក់ទំនង​រវាង​សហរដ្ឋ​អាមេរិក និង​ប្រទេស​ចិនបាន​ឈានដល់​ចំណុច​មួយ​ដែលមាន​អារម្មណ៍​ដូចជា​កាន់តែ​យ៉ាប់យ៉ឺន​ទៅ ហើយ​ការយល់ច្រឡំ​មួយ​ទំនងជា​ផ្ទុះ​ឡើងជា​ភ្លើង​ដ៏​ធំ​មួយ​ ដែល​អាច​ផលប៉ះពាល់​យ៉ាងខ្លាំង​សម្រាប់​យើងទាំងអស់គ្នា​។ ​ក្នុង​ខែ​នេះ លោកស្រី Tai បាន​សន្ទនា​តាម​ទូរស័ព្ទ​ជាមួយ​ឧបនាយករដ្ឋមន្ត្រី​ចិនលោក Liu He ដើម្បី​ពិភាក្សា​អំពី​ការ​កង្វះខាត​របស់​ចិន​ ក្នុងការ​អនុលោម​តាម​កិច្ចព្រមព្រៀង​ពាណិជ្ជកម្ម "​ដំណាក់កាល​ទី១" ​ជាមួយ​សហរដ្ឋអាមេរិក​ដែល​បាន​ឈានដល់​កិច្ចព្រមព្រៀង​ ក្រោម​ការដឹកនាំ​របស់​អតីត​ប្រធានាធិបតី​អាមេរិកលោក Donald Trump។​​

ក្រុមមន្ត្រី​អាមេរិក​បានចាត់ទុក​ការសន្ទនា​តាម​ទូរស័ព្ទ​នេះ​ថា ​ជាការ​សាកល្បង​នៃ​ទំនាក់ទំនង​ទ្វេភាគី​ជាមួយ​ទីក្រុង​ប៉េកាំង ខណៈដែល​មន្ត្រី​ចិន​បាន​ជំរុញ​លោកស្រី Tai ឲ្យ​លុបចោល​ការតំឡើង​ពន្ធ​លើ​មុខទំនិញ​របស់​ចិន​។​ ​កាលពី​ថ្ងៃ​ព្រហស្បតិ៍ លោកស្រី Tai បាន​និយាយ​ថា​ គោលបំណង​របស់លោក​ស្រី​គឺធ្វើ​ឲ្យ​កំដៅ​ថយចុះ​ ដើម្បី​ឲ្យ​យើង​អាចមាន​ទំនាក់ទំនង​ជាធម្មតា និង​ការសន្ទនា​ប្រកបដោយ​ភាពរលូនអំពី​របៀប​ដែល​យើង​អាច​រក្សា​ស្ថិរភាព​ ផ្នែក​ពាណិជ្ជកម្ម​របស់​យើង​ដែល​កំពុងដំណើរការ​៕

អត្ថបទ៖ សុខមាន