មន្ត្រីជាន់ខ្ពស់ទីក្រុងគីវ កាលពីថ្ងៃព្រហស្បតិ៍ (ទី១២ ខែធ្នូ) បាននិយាយថា ការដាក់ពង្រាយកងទ័ពអឺរ៉ុប ក្នុងប្រទេសអ៊ុយក្រែន អាចជួយធានាដល់កិច្ចព្រមព្រៀង នាពេលអនាគត ដែលមានគោលបំណងឲ្យទទួលបាននូវសន្តិភាព ក្នុងសង្គ្រាមជិត ៣ឆ្នាំជាមួយរុស្ស៊ី។

គួរបញ្ជាក់នាយករដ្ឋមន្ត្រីប៉ូឡូញ លោក Donald Tusk និងប្រធានាធិបតីបារាំង លោក Emmanuel Macron បានពិភាក្សាគ្នាអំពីគំនិតនៃការដាក់កងទ័ពបរទេស នៅអ៊ុយក្រែន ក្នុងករណីមានបទឈប់បាញ់ អំឡុងពេលពិភាក្សាគ្នា កាលពីថ្ងៃទី១២ ខែធ្នូ បើទោះជាលោក Tusk បានព្រមានថា ទីក្រុងវ៉ាសូវី បច្ចុប្បន្នមិនទាន់មានផែនការបែបនេះក៏ដោយ។

ការពិភាក្សានេះបានកើតឡើងនៅពេលដែលប្រធានាធិបតីជាប់ឆ្នោតរបស់សហរដ្ឋអាមេរិក លោក Donald Trump ជំរុញឲ្យមានបទឈប់បាញ់យ៉ាងឆាប់រហ័ស ដើម្បីបញ្ចប់ការប្រយុទ្ធគ្នានៅពេលដែលលោកចូលកាន់តំណែង ក្នុងខែមករា។

មន្ត្រីជាន់ខ្ពស់អ៊ុយក្រែនមួយរូប បានប្រាប់សារព័ត៌មាន AFP ថា ទីក្រុងគីវ បើកចំហ ចំពោះ «គំនិតទាំងអស់» ដែលអាចជួយធានាសន្តិភាព នាពេលអនាគត ក្នុងនោះរួមទាំង «ក្រុមយោធា« ត្រូវបានដាក់ពង្រាយនៅក្នុងប្រទេសអ៊ុយក្រែនផងដែរ។

ប្រភពនោះបានប្រាប់សារព័ត៌មាន AFP ថា៖ «ប្រធានាធិបតីរុស្ស៊ី លោក (Vladimir) Putin តែងតែរំលោភបទឈប់បាញ់ ដោយលោកបានធ្វើរាប់សិបដងមកហើយ មិនត្រឹមតែនៅអ៊ុយក្រែនប៉ុណ្ណោះទេ។ នោះហើយជាមូលហេតុដែលយើងត្រូវការការធានា ហើយវត្តមានរបស់កងកម្លាំងយោធាអាចជាផ្នែកមួយ ក្នុងចំណោមការធានាទាំងនោះ»៕