ក្រុមឃ្លាំមើលផ្ទៃក្នុងរបស់ក្រសួងយុត្តិធម៌អាមេរិក កាលពីថ្ងៃព្រហស្បតិ៍ (ទី១២ ខែធ្នូ) បានឲ្យដឹងថា FBI (ការិយាល័យស៊ើបអង្កេតសហព័ន្ធ) មិនបានបញ្ជូនភ្នាក់ងារសម្ងាត់ឲ្យទៅចូលរួម ក្នុងការវាយប្រហារថ្ងៃទី៦ ខែមករា ឆ្នាំ២០២១ នៅវិមានកាពីតូលរបស់សហរដ្ឋអាមេរិក ហើយមិនអនុញ្ញាតឲ្យអ្នកផ្តល់ព័ត៌មានរបស់ខ្លួនចូលទៅក្នុងអគារ ឬចូលរួមក្នុងអំពើហិង្សានេះឡើយ។

ការរកឃើញដោយប្រមុខក្រុមអធិការកិច្ចរបស់ក្រសួងយុត្តិធម៌ លោក Michael Horowitz ផ្ទុយទៅនឹងការយល់ឃើញឃុបឃិតស្តាំនិយមជ្រុលរបស់អ្នកគាំទ្រប្រធានាធិបតីជាប់ឆ្នោត លោក Donald Trump ដែលបានធ្វើការអះអាងឥតមូលដ្ឋានម្តងហើយម្តងទៀត ក្នុងន័យបង្ហាញថា ប្រតិបត្តិករ FBI មានជាប់ពាក់ព័ន្ធដោយសម្ងាត់ក្នុងកុបកម្ម នៅវិមានកាពីតូល។

ការអះអាងមិនពិតមួយ ទាក់ទងនឹងលោក James Ray Epps ជាអ្នកទៅពីរដ្ឋ Arizona ដែលបានចូលទៅក្នុងវិមានកាពីតូល នៅថ្ងៃនោះ។ លោក Epps ដែលត្រូវបានចោទប្រកាន់ក្នុងឆ្នាំ២០២៣ ពីបទមជ្ឈិម ដោយសារបានចូលទៅក្នុងអគារ ឬបរិវេណដែលត្រូវបានហាមឃាត់នោះ ត្រូវបានចោទប្រកាន់មិនពិត ដោយអ្នកគាំទ្ររបស់លោក Trump និងដោយអតីតពិធីករប្រព័ន្ធផ្សព្វផ្សាយ Fox News លោក Tucker Carlson ថា ជាអ្នកផ្តល់ព័ត៌មានសម្ងាត់របស់រដ្ឋាភិបាល។

គួរបញ្ជាក់ថា របាយការណ៍របស់លោក Horowitz កើតឡើងជាងមួយខែមុនពេល លោក Trump នឹងធ្វើពិធីស្បថចូលកាន់តំណែងជាប្រធានាធិបតីអាណត្តិទី២ របស់លោក។ លោកបានសន្យាផ្តល់ការលើកលែងទោសដល់មនុស្សជាច្រើនដែលបានសម្រុកចូលវិមានកាពីតូល ភ្លាមៗ នៅថ្ងៃដំបូងនៃការកាន់តំណែងរបស់លោក៕