នៅថ្ងៃសុក្រនេះ ក្រសួងការពារជាតិចិន បាននិយាយពីសកម្មភាពយោធារយៈពេលប៉ុន្មានថ្ងៃកន្លងមកនេះ នៅជុំវិញកោះតៃវ៉ាន់ ដោយពួកគេនិយាយថា វាអាស្រ័យលើចិន ដែលត្រូវសម្រេចចិត្តថាតើធ្វើ ឬមិនធ្វើសមយុទ្ធ ហើយយោធាចិននឹងមិនគ្មានមុខនោះទេ ក្នុងការប្រយុទ្ធជាមួយកងកម្លាំងផ្តាច់ខ្លួន ។

កាលពីថ្ងៃចន្ទដើមសប្តាហ៍នេះ ក្រសួងការពារជាតិកោះតៃវ៉ាន់ បន្តប្រុងប្រយ័ត្ន និងបើកដំណើរការមជ្ឈមណ្ឌលឆ្លើយតបបន្ទាន់ ក្រោយរាយការណ៍ការកើនឡើងខ្លាំងសកម្មភាពយោធាចិន ទាំងនៅជុំវិញកោះ ទាំងនៅសមុទ្រចិនខាងកើត និងសមុទ្រចិនខាងត្បូង ។

យោធាចិន ពុំបានធ្វើសេចក្តីប្រកាសនោះទេពីសមយុទ្ធណាមួយនឹងកើតឡើងនោះ ។ ទីក្រុងប៉េកាំងចាត់ទុកកោះតៃវ៉ាន់គ្រប់គ្រងបែបប្រជាធិបតេយ្យថាជាដែនដីរបស់ខ្លួន គឺជាអំណះអំណាងមួយត្រូវបានច្រានចោលដោយអាជ្ញាធរទីក្រុងតៃប៉ិ ដែលនិយាយថា មានតែពលរដ្ឋកោះតៃវ៉ាន់មួយគត់ ដែលអាចសម្រេចចិត្តលើអនាគតរបស់ពួកគេបាន ។

នៅក្នុងសេចក្តីថ្លែងការណ៍ឆ្លើយតបនឹងសំនួរពីដំណើរទស្សនកិច្ចកាលពីពេលថ្មីៗនេះរបស់មេដឹកនាំកោះតៃវ៉ាន់លោក Lai Ching-te ទៅកាន់កោះហាវ៉ៃ និងដែនដីគាំរបស់សហរដ្ឋអាមេរិក និងថាតើចិននឹងធ្វើ ឬមិនធ្វើសមយុទ្ធនោះ ក្រសួងការពារជាតិចិន ពុំបានផ្តល់ការបញ្ជាក់ ឬច្រានចោលនោះទេ ៕