រដ្ឋមន្ត្រីការបរទេសទួរគី លោក Hakan Fidan នៅថ្ងៃសុក្រ (ទី១៣ ខែធ្នូ) បាននិយាយថា អាទិភាពចម្បងរបស់ប្រទេសទួរគី នៅប្រទេសស៊ីរី គឺការធានាស្ថិរភាព និងទប់ស្កាត់ការត្រួតត្រារបស់ក្រុមដែលត្រូវបានចាត់ទុកថា ជាក្រុមភេរវករ ក្រោយរបបរបស់មេដឹកនាំ លោក Bashar al-Assad ដួលរលំ។

ដោយថ្លែងជាមួយរដ្ឋមន្ត្រីការបរទេសអាមេរិក លោក Antony Blinken បន្ទាប់ពីកិច្ចប្រជុំរបស់ឥស្សរជនទាំង២ នៅទីក្រុងអង់ការ៉ា លោក Fidan បានប្រាប់ថា តួនាទីទួរគី និងសហរដ្ឋអាមេរិកដែលអាចមាន សម្រាប់អនាគតរបស់ប្រទេសស៊ីរី គឺជាប្រធានបទដែលពួកលោកបានពិភាក្សា។

លោកបាននិយាយថា៖ «ក្នុងស្ថានភាពថ្មី នៅប្រទេសស៊ីរី យើងបានពិភាក្សាអំពីអ្វីដែលអាចធ្វើបាន ដើម្បីសុខុមាលភាពរបស់ប្រជាជនស៊ីរី ឯកភាព បូរណភាព សុខដុមរមនា និងអធិបតេយ្យភាពរបស់ប្រទេសនេះ។ យើងក៏បានពិភាក្សាផងដែរ អំពីតួនាទីរបស់ទួរគី សហរដ្ឋអាមេរិក និងប្រទេសផ្សេងទៀត ក្នុងតំបន់ ហើយនិងអំពីរបៀបថា តើយើងអាចសហការគ្នាយ៉ាងដូចម្ដេច ដើម្បីដោះស្រាយបញ្ហាទាំងនេះ»។

លោក Fidan បានបន្ថែមទៀតថា៖ «យើងបានពិភាក្សាគ្នាថា ការទប់ស្កាត់អំពើភេរវកម្ម នៅប្រទេសស៊ីរី និងការធានាថា ក្រុម Daesh និង PKK មិនបានត្រួតត្រា នៅទីនោះ គឺជាអាទិភាពមួយ ក្នុងចំណោមអាទិភាពរបស់យើង។ យើងបានពិភាក្សាយ៉ាងហ្មត់ចត់ អំពីអ្វីដែលយើងអាចធ្វើ ទាក់ទងនឹងបញ្ហាទាំងនេះ អំពីអ្វីជាកង្វល់រួមរបស់យើង និងអំពីដំណោះស្រាយរួម គួរមាន»។

ទាក់ទងនឹងតំបន់ហ្កាហ្សា លោក Fidan បានប្រាប់ថា ពួកលោកក៏បានលើកឡើងពីតម្រូវការ ដើម្បីឲ្យមានបទឈប់បាញ់នៅក្នុងតំបន់នេះ ដោយនិយាយថា៖ «យើងបានយល់ព្រមពីភាពបន្ទាន់នៃការសម្រេចបានបទឈប់បាញ់។ ទាំងសហរដ្ឋអាមេរិក និងទួរគី រួមជាមួយនឹងសម្ព័ន្ធមិត្តផ្សេងទៀត កំពុងធ្វើការយ៉ាងយកចិត្តទុកដាក់ ដើម្បីសម្របសម្រួលឲ្យមានបទឈប់បាញ់ ក្នុងតំបន់។ តែជារឿងគួឲ្យសោកស្ដាយ ការមានអំពើហិង្សាដដែល នៅតែបន្តមាន។ អ៊ីស្រាអែលនៅតែសម្លាប់ជនស៊ីវិល។ យើងបានពិភាក្សាអំពីវិធានការដែលយើងអាចមាន ដើម្បីបញ្ឈប់វិបត្តិនេះឲ្យបានឆាប់តាមដែលអាចធ្វើទៅបាន»៕