អ្នកជំនាញបច្ចេកទេសយានយន្ត នៃវិទ្យាស្ថានជាតិពហុបច្ចេកទេសកម្ពុជា(NPIC) នៃក្រសួង​ការងារ និងបណ្ដុះបណ្ដាលវិជ្ជាជីវៈ បានអំពាវនាវ​ឲ្យ​មាននារីចូលរៀនវគ្គបច្ចេក​ទេស​មេកា​និក​យាន​យន្ត​ឲ្យបានច្រើនថែមទៀត ខណៈដែលកំពុងមានតម្រូវការទីផ្សារការងារខ្ពស់នៅកម្ពុជា និងសកលលោក។

លោក មិន ឆេងហ៊ាន់ នាយកមហាវិទ្យាល័យជំនាញបច្ចេសទេសមេកានិកយានយន្តនៃវិទ្យាស្ថាន NPIC បានមានប្រសាសន៍ថា «សិស្សជានារីមានចំនួនតិចជាងសិស្សជាបុរស ដែលមកចុះឈ្មោះ​ចូល​រៀន​ជំនាញ​មេកានិកយានយន្តនៅសាលា NPIC។ ប្រសិនបើសិស្សនារីចូលរៀន គឺគាត់​អាច​មាន​លទ្ធភាពក្នុងការរកការងារបានឆាប់រហ័យ ហើយតម្រូវការទីផ្សារខ្ពស់ទៀតផង»។

លោកនាយកបន្តថា «នារីនៅពេលរៀនចប់ អាចក្លាយជា Service Advisor ជាពិសេសខ្ញុំកន្លងមកសង្កេតឃើញថា នារី គឺខាងក្រុមហ៊ុនត្រូវការច្រើន ដោយសារគាត់អាចកាន់ Spare Part Stock ផ្សេងៗបាន ហើយពេលចេញទៅក្រុមហ៊ុន គេបង្រៀនគាត់ថែមទៅ គាត់អាចគេទទួលស្គាល់សមត្ថភាព គឺល្អមែនទែន»។

លើសពីនេះ លោកនាយកបានលើកទឹកចិត្តដល់សិស្សជានារីគួរតែហ៊ានប្រកួតប្រជែងសមត្ថភាព និងចូលប្រឡូកក្នុងវិស័យមេកានិកយានយន្តជាមួយនឹងសិស្សជាបុរស ព្រោះសមត្ថភាពបុរស និងនារីមិនមានភាពខុសគ្នាច្រើននោះទេ។ នារីបច្ចុប្បន្ននេះមានសមត្ថភាពគ្រប់គ្រាន់ទាំងចំណេះដឹង និងកម្លាំងកាយ ដើម្បីចូលប្រឡូកក្នុងវិស័យការងារផ្នែកយានយន្ត។

លោក ឆេងហ៊ាន់ បានបញ្ជាក់ពីសារៈសំខាន់នៃការចាប់យកជំនាញមូលដ្ឋានក្នុង​វិស័យមេកានិចរថយន្ត។ លោកថា មុខវិជ្ជានេះមានសារៈសំខាន់ណាស់ ព្រោះវាអាចឱ្យសិស្សអនុវត្តគោលគំនិតក្នុងការផលិត និងការងារជួសជុលយានយន្តប្រកបដោយជំនាញច្បាស់លាស់។

ជាទូទៅសិស្សនិស្សិតដែលលោកបានបង្រៀន គឺលោកណែនាំពួកគេឱ្យយល់អំពីមូលដ្ឋានដូចជា អគ្គិសនី គ្រឿងបន្លាស់យន្តរថយន្តគ្រប់ប្រភេទ គ្រឿងម៉ាស៊ីនខាងក្នុង និងប្រព័ន្ធគ្រប់គ្រងអេឡិចត្រូនិក ដើម្បីធ្វើជាមូលដ្ឋាន ហើយអាចក្លាយជាអ្នកជំនាញខាងការងារបច្ចេកទេសយានយន្ត។

ឆ្លងកាត់ការបង្ហាត់បង្រៀនសិស្សនិស្សិតកន្លងមកនេះ លោកបានបង្ហាញពីសមិទ្ធផលសំខាន់ៗរបស់សិស្សនិស្សិតជាច្រើន រួមទាំងការងារស្រាវជ្រាវមួយចំនួនដែលឆ្លុះបញ្ចាំងពីភាពជោគជ័យរបស់សិស្ស និងសាលា NPICផងដែរ។

លោកបានពន្យល់ថា លទ្ធិផលដែលពួកគេខំប្រឹងប្រែងពេលនេះ គឺជាភាពជោគជ័យដ៏សំខាន់ក្នុងជីវិតពួកគេ ដោយសារសមត្ថភាពអាចធ្វើការផលិតរបស់របរប្រើប្រាស់ គ្រឿងបន្លាស់យានយន្ត និងការជួសជុល។ បន្ទាប់ពីពួកគេបានរៀនចប់ក្នុងរយៈពេល ៤ឆ្នាំ ជាពិសេសប្រសិនពួកគេយកសមត្ថភាពទៅផ្គុំបញ្ចូលគ្នា គឺពួកគាត់មានសមត្ថភាពអាចផលិតជាសម្ភារៈ ឬយានយន្តទាំងមូលបានតែម្ដង។

និស្សិតបញ្ចប់ការសិក្សាពីកម្មវិធីនេះ គឺមានភាពគ្រប់គ្រាន់ក្នុងការបន្តអាជីពផ្សេងៗ។ លោកបានបន្ថែមថា បន្ទាប់ពីបញ្ចប់ការសិក្សា ពួកគេអាចចូលរួមក្នុងឧស្សាហកម្មដែលទាក់ទងនឹងសង្វាក់ផលិតកម្មដូចជា ការផលិតយានយន្តគ្រប់ប្រភេទ អាចចូលរួមក្នុងការងារជួសជុលយានយន្ត និងអាចចាប់ផ្តើមអាជីវកម្មផ្ទាល់ខ្លួន ឬទទួលយកការងារផ្សេងទៀតនៅក្នុងវិស័យមេកានិចយានយន្ត៕