នៅព្រឹកថ្ងៃសុក្រនេះ ប្រជាពលរដ្ឋរស់នៅក្នុងទីក្រុងគីវ បាននាំគ្នារត់រកទីជម្រកជាថ្មីម្តងទៀតនៅក្នុងស្ថានីយ៍រថភ្លើងក្រោមដីរបស់រដ្ឋធានីអ៊ុយក្រែនមួយនេះ ពេលដែលរុស្ស៊ី បើកការវាយប្រហារមីស៊ីល និងយានដ្រូនទ្រង់ទ្រាយធំលើហេដ្ឋារចនាសម្ព័ន្ធថាមពលរបស់ពួកគេ ។

ប្រធានាធិបតីអ៊ុយក្រែនលោក Volodymyr Zelenskiy និយាយថា រុស្ស៊ីបានបើកការវាយប្រហារមីស៊ីល ៩៣គ្រាប់ និងយានដ្រូនជិត ២០០គ្រឿង នៅក្នុងការវាយប្រហារមួយនៃការវាយប្រហារនាសម័យសង្រ្គាមធំបំផុតរបស់ពួកគេ លើប្រព័ន្ធថាមពលអ៊ុយក្រែន នៅថ្ងៃសុក្រនេះ ។

លោក Zelenskiy និយាយថា ប្រព័ន្ធការពារដែនអាកាសអ៊ុយក្រែន អាចបាញ់ទម្លាក់មីស៊ីលរុស្ស៊ី ៨១គ្រាប់ រួមទាំងមីស៊ីល ១១គ្រាប់បាញ់ចេញពីយន្តហោះចម្បាំង F-16 ។

ក្រុមហ៊ុនថាមពលធំបំផុត DTEK របស់អ៊ុយក្រែន និយាយថា កម្លាំងមីស៊ីលរបស់រុស្ស៊ី ធ្វើឲ្យមានការខូចខាតធ្ងន់ធ្ងរដល់ឧបករណ៍នៅរោងចក្រថាមពលកម្តៅ អំឡុងការវាយប្រហារពេលព្រឹកលើហេដ្ឋារចនាសម្ព័ន្ធថាមពល ។ 

ការវាយប្រហារមីស៊ីលនៅពេលព្រឹក បានកើតមានឡើង បន្ទាប់ពីការវាយប្រហារដោយយានដ្រូនរាប់សិបគ្រឿងកាលពីយប់កន្លងទៅ ។

សូមបញ្ជាក់ថា ប្រព័ន្ធថាមពលអ៊ុយក្រែន រងគ្រោះដោយសាររលកនៃការវាយប្រហារ ១១លើករួចមកហើយក្នុងឆ្នាំនេះ ដែលបណ្តាលឲ្យមានការខូចខាតទ្រង់ទ្រាយធំ និងការកាត់ផ្តាច់ចរន្តអគ្គិសនីរយៈពេលយូរនៅទូទាំងប្រទេស ៕