​បាល់ទាត់៖ ​ក្លិប​បាល់ទាត់​អេ​ស្ប៉ា​ញ FC Barcelona បាន​ប្រកាស​យក​គ្រូ​ក្រុម​បម្រុង​រឺ Barcelona B លោក Sergi Barjuan ឱ្យ​ដឹកនាំ​ក្រុម​បណ្ដោះអាសន្ន​សិន​បន្ទាប់ពី​លោក Ronald Koeman ត្រូវ​បាន​បណ្ដេញ​ចេញពី​តំណែង​។ ​ប្រធាន​ក្លិប​លោក Joan Laporta បាន​ណែនាំ​លោក Sergi Barjuan មកកាន់​ក្រុម​ធំ​នៅ​ថ្ងៃ​ព្រហស្បតិ៍​ម្សិលមិញ​ ខណៈ​ការស្វែងរក​អ្នកចាត់ការ​នៅតែ​បន្ត​។

​​ប្រកួត​ដំបូង​របស់ Barcelona ក្រោម​ដឹកនាំ​របស់លោក Sergi Barjuan គឺ​ត្រូវ​ទទួល Alaves នៅ​ថ្ងៃ​សៅរ៍​ស្អែក​នេះ​។ ​រំលឹកថា​ លោក Sergi Barjuan ធ្លាប់ជា​កីឡាករ​ខ្សែការពារ​ស្លាប​ខាងឆ្វេង​របស់ Barcelona និង​ជា​កីឡាករ​ដែល​ចេញពី​ថ្នាល​យុវជន​របស់ Barcelona ផងដែរ​។ អតីត​កីឡាករ​ជំរើសជាតិ​អេ​ស្ប៉ា​ញ​រូបនេះ​ក៏បាន​ឈ្នះ​ពាន​លី​គ​អេ​ស្ប៉ា​ញ​ ៣លើក​ជាមួយ Barcelona​។​ ​សូមបញ្ជាក់ថា​ លោក Ronald Koeman ត្រូវបាន​ក្លិប​បណ្តេញ​ចេញពី​តំណែង​ភ្លាមៗ​ក្រោយពេល Barcelona ចាញ់​នៅ​ទឹកដី Rayo Vallecano ១-០ កាលពី​យប់​ថ្ងៃ​ពុធ​ក្រោយ​ដឹកនាំ​បាន ១៤ខែ​។

ការចាកចេញ​របស់​អតីត​អ្នកចាត់ការ​ក្រុម​ជំរើសជាតិ​ហូ​ឡង់​រូបនេះ Barcelona កំពុង​ឈរ​លេខ៩ ក្នុង​តារាង​ដេញ​ពីក្រោយ​ក្រុម​កំពូល​តារាង Real Madrid ៦ពិន្ទុ​។ ​​ជាមួយគ្នា​នោះដែរ Barcelona ត្រូវបាន​គេ​ដឹងថា ​កំពុង​ចរចា​ជាមួយ​អ្នកចាត់ការ​ក្លិប​កាតា Al Sadd, Xavi Hernandez ផងដែរ​តែ​មិនទាន់​ចេញ​ជា​រូបរាង​។ ​យ៉ាងណាក្តី​សារព័ត៌មាន​អឺរ៉ុប​មួយចំនួន​បានឱ្យដឹងថា Xavi បាន​យល់ព្រម​ទទួល​ការងារ​នៅ Barcelona ទៅហើយ និង​រង់ចាំតែ​ការចរចា​ជាមួយ​សាមី​ក្លិប Al Sadd ប៉ុណ្ណោះ​៕

​អត្ថបទ​៖​នាង សុភា​វុ​ធ