ក្រុមអ្នកទេសចរចុងក្រោយចំនួន ៨៨៩នាក់ ដែលស្នាក់នាពេលយប់ នៅភ្នំ Phu Kradueng ក្នុងខេត្ត Loei ប្រទេសថៃ ត្រូវបានជម្លៀសចេញ នាព្រឹកថ្ងៃសុក្រ (ទី១៣ ខែធ្នូ) បន្ទាប់ពីឧទ្យានជាតិ Phu Kradueng ត្រូវបានបិទដោយគ្មានកាលកំណត់។

អ្នកទេសចរទាំងនោះត្រូវបានអមដំណើរចុះពីលើភ្នំ ដោយមន្ត្រីឧទ្យាន បន្ទាប់ពីលោក Adisorn Hemthanon ប្រធានឧទ្យានបានប្រកាសបិទ កាលពីថ្ងៃព្រហស្បតិ៍ (ទី១២ ខែធ្នូ)។

ការសម្រេចនេះត្រូវបានធ្វើឡើង ដើម្បីការពារការវាយប្រហារបន្ថែមទៀតពីពពួកសត្វដំរីព្រៃ។ ហើយការប្រកាសបិទនេះបានកើតឡើង បន្ទាប់ពីដំរីព្រៃមួយក្បាល បានវាយប្រហារ និងសម្លាប់ស្ត្រីវ័យ ៤៩ឆ្នាំម្នាក់ មកពីខេត្ត Chachoengsao។

ហេតុការណ៍នោះបានកើតឡើង នៅពេលស្ត្រីរងគ្រោះ និងស្ត្រីម្នាក់ទៀត កំពុងដើរតាមផ្លូវធម្មជាតិ Ong Phra Buddha Metta ឆ្ពោះទៅកាន់ទឹកធ្លាក់ Phen Phop។ ដំរីនេះត្រូវបានរាយការណ៍ថា បានវាយប្រហារលើស្ត្រីនោះចំនួន ២ដង រហូតបណ្ដាលឲ្យគាត់បាត់បង់ជីវិត។

នៅល្ងាចនេះ មន្ត្រីឧទ្យានបានរកឃើញភស្តុតាងដែលបង្ហាញថា នៅតែមានដានជើងរបស់សត្វដំរីលើផ្លូវទេសចរណ៍ ដែលបង្កឲ្យមានការព្រួយបារម្ភ អំពីសុវត្ថិភាពអ្នកទៅលេងកម្សាន្ត៕