តុលាការរបស់ប្រទេសហូឡង់ នៅថ្ងៃសុក្រ (ទី១៣ ខែធ្នូ) នេះ បានច្រានចោលការការស្នើរបស់អង្គការក្រៅរដ្ឋាភិបាលដែលគាំទ្រប៉ាឡេស្ទីនចំនួន ១០ ដើម្បីបញ្ឈប់ប្រទេសហូឡង់កុំឲ្យនាំចេញអាវុធទៅកាន់ប្រទេសអ៊ីស្រាអែល និងកុំឲ្យជួញដូរជាមួយអ្នកតាំងទីលំនៅជនជាតិអ៊ីស្រាអែល នៅក្នុងដែនដីកាន់កាប់ប៉ាឡេស្ទីន។

តុលាការក្រុងឡាអេបានសង្កត់ធ្ងន់ថា រដ្ឋមានភាពបត់បែនមួយចំនួនក្នុងគោលនយោបាយរបស់ខ្លួន ហើយតុលាការមិនគួរប្រញាប់ប្រញាល់ចូលទៅពាក់ព័ន្ធនោះឡើយ។ ស្ថាប័ននេះបានឲ្យដឹងនៅក្នុងសេចក្តីថ្លែងការណ៍មួយថា៖ «ស្ថាប័នយុត្តិធម៌ បានរកឃើញថា មិនមានហេតុផលគ្រប់គ្រាន់ ដើម្បីដាក់បម្រាមទាំងស្រុងលើការនាំចេញគ្រឿងយុទ្ធោបករណ៍ និងទំនិញប្រើប្រាស់បានទាំងស៊ីវិល និងយោធានោះឡើយ»។

ដើមបណ្តឹងដែលបានលើកឡើងពីការស្លាប់ជនស៊ីវិលក្នុងចំនួនដ៏ច្រើន នៅក្នុងសង្គ្រាមរបស់អ៊ីស្រាអែល នៅតំបន់ហ្កាហ្សាស្ទ្រីប បានអះអាងថា រដ្ឋហូឡង់ដែលជាហត្ថលេខីនៃអនុសញ្ញាប្រល័យពូជសាសន៍ឆ្នាំ១៩៤៨ មានកាតព្វកិច្ចចាត់វិធានការសមស្របទាំងអស់ ក្នុងការទប់ស្កាត់អំពើប្រល័យពូជសាសន៍។

ចៅក្រម នៅឯតុលាការប្រចាំតំបន់ ក្នុងទីក្រុងឡាអេ បានគាំទ្ររដ្ឋហូឡង់ ដែលបាននិយាយថា ខ្លួនបន្តវាយតម្លៃឥតដាច់ពីហានិភ័យ ពាក់ព័ន្ធនឹងអាវុធ និងទំនិញប្រើប្រាស់បានទាំងយោធា និងស៊ីវិល ដែលត្រូវបាននាំចេញទៅប្រទេសអ៊ីស្រាអែល ហើយតាមដាននូវវិធីប្រើប្រាស់ ដើម្បីពិចារណាមើលថា តើអាចនាំឲ្យមានការរំលោភលើច្បាប់អន្តរជាតិដែរ ឬទេ ខណៈម្តងម្កាលបានបដិសេធការនាំចេញមួយចំនួន៕