សង្កាត់ Tadamon នៃទីក្រុងដាម៉ាស់ ប្រទេសស៊ីរី ពាសពេញដោយឆ្អឹងខ្មោច ដែលអ្នកស្រុក និងក្រុមសិទ្ធិមនុស្សរៀបរាប់ថា ទីនោះគឺជាកន្លែងសម្លាប់រង្គាលទ្រង់ទ្រាយធំ ក្រោមការគ្របគ្រងផ្តាច់ការរបស់លោកអតីតប្រធានាធិបតី Bashar al-Assad ។

សង្កាត់ Tadamon បានក្លាយជាកន្លែងគួរឲ្យចាប់អារម្មណ៍ ក្រោយបែកធ្លាយវីដេអូឆ្នាំ ២០២២ ឃើញបុរសម្នាក់ក្នុងឯកសណ្ឋានយោធា នាំមនុស្សប្រុសចងមុខគ្មានអាវុធក្នុងដៃមួយក្រុមដើរសំដៅរទៅកាន់រណ្តៅដ៏ធំមួយ រួចនិយាយប្រាប់ពួកគេថាឲ្យរត់ និងបានបាញ់ប្រហាររហូតដល់ពួកគេដេកដួលលើដី ។

ក្រុមអ្នកស្រុក និយាយប្រាប់ទីភ្នាក់ងារព័ត៌មានរ៉យទ័រថា ឧបទ្ទេវហេតុនេះ បានកើតឡើងនៅឆ្នាំ ២០១៣ ប៉ុន្តែការសម្លាប់រង្គាលបន្តរហូតដល់កាលពីពេលថ្មីៗនេះ ដោយពួកគេនិយាយថា ពួកគេតែងតែមើលឃើញកងកម្លាំងសន្តិសុខស៊ីរី នាំមនុស្សប្រុសទៅកាន់ទីនោះ និងឮសំឡេងស្នូរគ្រាប់កាំភ្លើង និងក្លិនឈ្ងៀមដុតសាកសព ។

លោក Mohammad al-Darra គឺជាបុរសវ័យចំណាស់ម្នាក់រស់នៅក្នុងសង្កាត់ Tadamon និយាយថា លោកបានស្នាក់នៅក្នុងសង្កាត់នេះ ក្រោយសង្រ្គាមស៊ីវិលចាប់ផ្តើមកាលពីឆ្នាំ ២០១១ ដោយសារគ្រួសាររបស់លោកខ្លាចផ្ទះល្វែងរបស់ពួកគេត្រូវចោរលួច ។ 

លោកថា ពី ១ឆ្នាំ ទៅ ១ ឆ្នាំ លោកមើលឃើញរថយន្តរបស់កងកម្លាំងប្រដាប់អាវុធស៊ីរី ដឹកមនុស្សប្រុសចងស្វាបសេកទៅកាន់ផ្លូវតូចមួយនោះ ជាកន្លែងដែលលោកគិតថា ការសម្លាប់រង្គាល Tadamon កើតឡើង ។

អ្នកសារព័ត៌មានរបស់ទីភ្នាក់ងាររ៉យទ័រ បានរឃើញគំនរឆ្អឹងខ្មោចគរលើសំរាម ប្លាស្ទិកចេះខ្លោច សម្លៀកបំពាក់គគ្រិច ទាំងនៅក្នុងអគារ និងលើដី ហើយនិងមើលឃើញក្មេងៗលេងជាមួយអ្វីដែលទំនងជាឆ្អឹងជំនីមនុស្ស និងឆ្អឹកភ្លៅមនុស្ស ។

លោក Khaled Houriya ដែលជាម្ចាស់ហាងមេកានិកនៅតំបន់នោះ និយាយថា ញឹកញាប់ខ្លាំងណាស់ដែលលោកបានឮស្នូរគ្រាប់កាំភ្លើង ហើយនិងក្លិនឈ្ងៀមដុតសាកសព ក្រោយវិលត្រឡប់មកកាន់សង្កាត់នេះវិញ កាលពីឆ្នាំ ២០១៩ ។ លោកថា កងកម្លាំងសន្តិសុខស៊ីរីថែមទាំងសុំឲ្យអ្នកជិតខាងរបស់លោក ជីកផ្នូរខ្មោចយ៉ាងធំទៀតផង ។

ក្រុមអ្នកស្រុក និយាយថា ពួកគេមិនហ៊ាននិយាយនោះទេ អំឡុងការគ្រប់គ្រងរបស់លោក Assad ពេលដែលការរិះគន់អាជ្ញាធរ ត្រូវបានគាបសង្កត់ និងរឹតត្បិតយ៉ាងធ្ងន់ធ្ងរបំផុត ៕