នៅព្រឹកថ្ងៃទី១៤ ខែធ្នូ ឆ្នាំ២០២៤នេះ ប្រជាពលរដ្ឋរស់ ភូមិព្រៃជ្រៅ ឃុំក្បាលកោះ ស្រុកទឹកផុស ខេត្តកំពង់ឆ្នាំង ទទួលបានអណ្តូងទឹកចំនួន១០ ពីលោកជំទាវ ឌី សុខីទីឃាយុកោ ភរិយាឯកឧត្តម ហ៊ុន ម៉ានិត ប្រធានមូលនិធិអណ្តូងទឹកស្អាត អ្នកឧកញ៉ាមហាភក្តីសប្បុរិសភោគាធិបតី ហ៊ុន នាង និងមហាឧបាសិកា ឌី ប៉ុក។

ក្នុងពិធីប្រគល់អណ្តូងទឹកស្អាតទាំងនោះ លោកជំទាវប្រធានមូលនីធិ បាននាំនូវការផ្ដាំផ្ញើសួរសុខទុក្ខពីសំណាក់សម្ដេចតេជោ ហ៊ុន សែន សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី និងលោកជំទាវបណ្ឌិត ជូនចំពោះបងប្អូនប្រជាពលរដ្ឋ ដែលបានចូលរួមថា សម្តេចលោកតែងតែគិតគូរជានិច្ច ចំពោះសុខទុក្ខប្រជាពលរដ្ឋគ្រប់ទិសទី ជាពិសេសការផ្តល់ជូនអណ្តូងទឹកស្អាតនាពេលនេះ។

លោកជំទាវប្រធានមូលនិធិឱ្យដឹងទៀតថា អណ្តូងទឹកទាំងនេះ គឺជាអំណោយកេរមរតករបស់ មាតាបិតា បង្កើតសម្តេចតេជោ ហ៊ុន សែន និង សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន តែពួកគាត់បានទទួលអនិច្ចកម្មអស់ទៅហើយ នៅពេលដែលពួកគាត់មានជីវិត គឺគាត់ចូលចិត្តបុណ្យដាក់ទាន មានចិត្តសប្បុរសធម៌ បរិច្ចាគទ្រព្យធនផ្ទាល់ខ្លួនជាច្រើន ក្នុងវិស័យមនុស្សធម៌ ពិសេសប្រជាពលរដ្ឋដែលរស់នៅតាមទីជនបទ ខ្វះខាតទឹកស្អាតប្រើប្រាស់តែម្តង។ ហេតុដូច្នេះហើយមុនពេលដែលលោកលាចាកលោកទៅ គឺបានផ្តាំផ្ញើកូនថា ថវិកានិងទ្រព្យសម្បត្តិដែលនៅសេសសល់ រួមទាំងបច្ចេយបុណ្យសពរបស់លោក ត្រូវយកមកធ្វើជាមូលនិធីអណ្តូងទឹកស្អាត ជូនប្រជាពលរដ្ឋប្រើប្រាស់តាមតម្រូវការ នៅទូទាំងប្រទេស ដោយមិនគិតពីនិន្នាការនយោបាយអ្វីឡើយ។

ប្រជាពលរដ្ឋដែលទទួលផលពីអណ្តូងទឹកទាំងអស់ សូមថ្លែងអំណរគុណយ៉ាងជ្រាលជ្រៅ ចំពោះម្ចាស់អំណោយខាងលើ ជាពិសេសក្រុមគ្រួសារសម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ដែលលោកតែងតែគិតគូរពីជីវភាពរស់នៅរបស់ប្រជាពលរដ្ឋគ្រប់ទីកន្លែង ជាពិសេសអណ្តូងទឹកទាំងនេះបានរួម ចំណែកកាត់បន្ថយ ការចំណាយរបស់ពួកគាត់បានមួយផ្នែក និងងាយស្រួលក្នុងការប្រើប្រាស់ទឹក ខណៈពីមុនត្រូវចំណាយថវិកាទិញទឹក រឺទៅរកទឹកនៅកន្លែងឆ្ងាយៗយកមកប្រើប្រាស់ប្រចាំថ្ងៃ។

ជំទាវប្រធានឱ្យដឹងថា មូលនិធិអណ្តូងទឹកស្អាតបានបង្កើតឡើងជាង១០ឆ្នាំមកហើយ ក្រោមការដឹកនាំដោយលោកជំទាវ បណ្ឌិត ពេជ ចន្ទមុន្នី ហ៊ុនម៉ាណែត តែបច្ចុប្បន្នលោកជំទាវបណ្ឌិត បានផ្ទេរភារកិច្ចនេះមកលោកជំទាវ ជាអ្នកដឹកនាំបន្ត ។ ដូច្នេះសូមលោកយាយ លោកតា បងប្អូន អុំពូមីង ដែលអាស្រ័យផលនៃអណ្តូងទឹកទាំងអស់ រួមគ្នាថែរក្សាអណ្តូងទឹកទាំងនេះអោយបានល្អជាប់យូអង្វែង ដើម្បីជាប្រយោជន៍រួមនៅក្នុងសហគម។ លោកជំទាវក៏សូមផ្តាំផ្ញើ ទៅដល់ប្រជាពលរដ្ឋ ទាំងអស់ ថែរក្សាសុខភាពឱ្យល្អ កុំហូបប្រៃពេកផ្អែមពេក ដើម្បីការពារជំងឺមិនឆ្លង។ ជាពិសេសសូមយកចិត្តដាក់មើលថែ ជនចាស់ជរា ព្រោះរដូវនេះអាកាសធាតុមានការប្រែប្រួលចុះត្រជាក់ អាចធ្វើឱ្យឈឺបាន។

សូមបញ្ជាក់ថានៅតាមគោលដៅប្រគល់អណ្តូងទឹក លោកជំទាវប្រធានមូលនិធិ និងក្រុមការងារបាននាំយកអំណោយទ្រនប់ដៃរបស់ សម្តេចតេជោ និងសម្តេចកិត្តិព្រឹទ្ធបណ្ឌិត ចែកជូនលោកយាយ លោកតា បងប្អូន អុំពូមីង ដែលបានចូលរួមក្នុងពីធី រួមមានថ្នាំពេទ្យ ក្រណាត់ស ក្រមា និងថវិកាមួយចំនួន។ ដោយឡែក កុមារា កុមារី តូចៗទទួលបានកាបូបស្ពាយ ទៅសាលាម្នាក់មួយៗផងដែរ៕