អ្នកបើកបរ បានពន្យល់ប្រាប់សារព័ត៌មានរ៉យទ័រថា ប្រជាជនគុយបា កាលពីថ្ងៃសុក្រ (ទី១៣ ធ្នូ) បាន    តម្រង់ជួររងចំាក្បែរស្ថានីយប្រេងឥន្ធនៈ ក្នុងទីក្រុង Havana ដោយសង្ឃឹមថា នឹងទទួលបានការបំពេញតម្រូវការច្រើន ខណៈដែលកោះនេះ ប្រឈមនឹងវិបត្តិកង្វះខាតប្រេងឥន្ធនៈ ចុងក្រោយបំផុត។  

ស្ថានីយប្រេងឥន្ធនៈជាច្រើននៅទូទាំងប្រទេសនេះ ត្រូវបានបិទអស់ជាច្រើនថ្ងៃ ដោយសារកង្វះខាតធ្ងន់ធ្ងរខុសពីធម្មតា បានធ្វើឲ្យប្រទេសជាតិនេះ ស្ទើរតែគ្មានប្រេងសាំង និងម៉ាស៊ូត ដោយបានអ្នកបើកបរជាប់គាំង និងតម្រង់ជួររងចាំចាក់ប្រេង នៅតាមស្ថានីយ ក្នុងទីក្រុង Havana។

វិបត្តិចុងក្រោយនេះ បានកើតឡើង ដោយសារការដាច់ចរន្តអគ្គិសនីទូទាំងប្រទេសចំនួនបីលើក ក្នុងរយៈពេលពីរខែ ដែលបានធ្វើឲ្យមនុស្សរាប់លាននាក់ រស់នៅក្នុងភាពងងឹត អស់រយៈពេលជាច្រើនថ្ងៃ ដែលជំរុញឲ្យរដ្ឋាភិបាលគ្រប់គ្រងដោយកុម្មុយនីស្ត ត្រូវបិទសាលារៀនជាបណ្តោះអាសន្ន និងឧស្សាហកម្ម ដែលមិនសំខាន់មួយចំនួន។

ក្រុមមន្ត្រី បានស្តីបន្ទោសការខ្វះខាតប្រេងឥន្ធនៈលើការហ៊ុមព័ទ្ធពាណិជ្ជកម្មរបស់សហរដ្ឋអាមេរិកមាន     រយៈពេលជាច្រើនទសវត្សរ៍ ដែលធ្វើឲ្យមានភាពស្មុកស្មាញដល់ប្រតិបត្តិការហិរញ្ញវត្ថុរបស់ប្រទេសគុយបានិងបង្កការលំបាកកាន់តែខ្លាំងដល់រដ្ឋាភិបាល ក្នុងការទិញប្រេងឥន្ធនៈ នៅលើទីផ្សារ។