​បាល់ទាត់៖ ​វិធានការ​តឺង​រ៉ឹង​លើ​ផ្នែក​សុខាភិបាល​នៅ​ក្របខណ្ឌ English Premier League នឹង​ត្រូវបាន​បន្ធូរបន្ថយ​នៅពេល​កីឡាករ​ទាំងអស់​ចាក់​វ៉ាក់សាំង​គ្រប់​ចំនួន​ពីរ​ដូ​សបាន ៨៥%​។ ​Premier League បានឱ្យដឹង​កាលពី​សប្តាហ៍​មុន​ថា​ កីឡាករ​ចំនួន ៦៨% បាន​ចាក់​វ៉ាក់សាំង​គ្រប់​ចំនួន​ពីរ​ដូ​ស និង ៨១% បាន​ចាក់​យ៉ាងហោចណាស់ ១ដូ​ស​។

​​វិធានការ​សុខាភិបាល​តឺង​រ៉ឹង​ត្រូវបាន​ដាក់ឱ្យអនុវត្ត​សម្រាប់​ក្លិប​ទាំងអស់​នៅ EPL ដែល​បូក​រួមទាំង​ទីលាន​ហ្វឹកហាត់ និង​កីឡដ្ឋាន​ប្រកួត​តាំងពី​ខែមិថុនា​ ឆ្នាំ២០២០​។​ ​​គិត​មកដល់ពេលនេះ​មាន​ក្លិប​ចំនួន ៧ ប៉ុណ្ណោះ​នៅ Premier League ដែលមាន​កីឡាករ​របស់ខ្លួន​លើសពី ៥០% បាន​ចាក់​វ៉ាកសាំង​គ្រប់​ចំនួន​ដូ​ស​គិត​ត្រឹម​ដំណាច់​ខែកញ្ញា​កន្លងទៅ​។​ ​​Premier League ក៏​កំពុង​ពិចារណា​ផ្តល់រ​ង្វាន់​លើកទឹកចិត្ត​ដល់​ក្លិប​ដែលមាន​អត្រា​អ្នក​ចាក់​វ៉ាក់សាំង​ខ្ពស់​ផងដែរ​។​ ​​ក្រោយ​ការធ្វើ​តេស្ត​ជុំ​ចុងក្រោយ Premier League បាន​រកឃើញ​ករណី​វិជ្ជមាន​ថ្មី ៤នាក់​ប៉ុណ្ណោះ​។​ ​​អ្នកចាំទី Newcastle, Karl Darlow ធ្លាប់បាន​ទទូច​ឱ្យ​កីឡាករ​ទាំងអស់​ទទួល​ការចាក់​វ៉ាកសាំង​ បន្ទាប់ពី​ខ្លួន​ទើប​ជាពី​ជំងឺ Covid-19 នេះ​ករណី​ធ្ងន់​។ ​​រំលឹក​ដែរ​ថាមាន​កីឡាករ​ជំរើសជាតិ​អង់គ្លេស​មួយចំនួន បាន​បដិសេធ​មិន​និយាយ​រឿង​វ៉ាកសាំង​នេះឡើយ​៕

​អត្ថបទ​៖​នាង សុភា​វុ​ធ