ក្រុមឆ្មាំល្បាតឆ្នេរ និយាយថា មនុស្សយ៉ាងហោច ៥នាក់ បានលង់ទឹកស្លាប់ ក្រោយទូកឈើរបស់ពួកគេលិចនៅជិតកោះភាគខាងត្បូង Gavdosរបស់ប្រទេសក្រិក ហើយសាក្សីនិយាយថា មនុស្សជាច្រើននាក់ផ្សេងទៀត បាត់ខ្លួន ខណៈដែលប្រតិបត្តិការរុករកកំពុងធ្វើឡើង ។

 ក្រុមឆ្មាំល្បាតឆ្នេរ បន្តថា មកទល់នឹងពេលនេះ មនុស្ស ៣៩នាក់ ដែលភាគច្រើននៃពួកគេមកពីប្រទេសប៉ាគីស្ថាន ត្រូវបានជួយសង្រ្គោះដោយនាវាដឹកទំនិញ ដែលបើកឆ្លងកាត់តំបន់នោះ ។ ពួកគេត្រូវបានបញ្ជូនមកកាន់កោះ Crete ហើយចំនួនមនុស្សបាត់ខ្លួន មិនទាន់បានបញ្ជាក់នៅឡើយទេ ។

 ទូកឆ្នាំល្បាតឆ្នេរ នាវាអ្នកជំនួញ នាវាចម្បាំងអ៊ីតាលី និងយន្តហោះកងទ័ពជើងទឹក បានចុះប្រតិបត្តិការរុករក ចាប់តាំងពីក្រុមអាជ្ញាធរក្រិក បានប្រកាសអាសន្នពីឧបទ្ទេវហេតុលិចទូកជនអន្តោប្រវេសន៍ កាលពីយប់ថ្ងៃសុក្រ ។

 នៅក្នុងឧបទ្ទេវហេតុដាច់ដោយឡែកមួយទៀតកាលពីថ្ងៃសៅរ៍ នាវាដោតទង់ជាតិម៉ាល់តា សង្រ្គោះបានជនអន្តោប្រវេសន៍ ៤៧នាក់ ពីទូកមួយគ្រឿងនៅចម្ងាយប្រហែល ៧៤គ.មពីកោះ Gavdos ខណៈដែលទូកដឹកប្រេងសង្រ្គោះជនអន្តោប្រវេសន៍ ៨៨នាក់ ពីទូកមួយគ្រឿងនៅចម្ងាយប្រហែល ៥២គ.មពីកោះតូចនៅភាគខាងត្បូងប្រទេសក្រិក ៕