ប្រធានាធិបតីកូរ៉េខាងត្បូង លោក Yoon Suk Yeol កាលពីថ្ងៃសៅរ៍ (១៤ ធ្នូ) បានប្តេជ្ញាថានឹងបន្តតស៊ូដើម្បីអនាគតនយោបាយរបស់ខ្លួន បន្ទាប់ពីលោកត្រូវបានចោទប្រកាន់ទម្លាក់តំណែងនៅក្នុងការបោះឆ្នោតលើកទីពីរដោយសភាដឹកនាំដោយក្រុមបក្សប្រឆាំង ជុំវិញការប៉ុនប៉ងរយៈពេលខ្លីរបស់លោកក្នុងការដាក់ច្បាប់អាជ្ញាសឹក ជាជំហានមួយដែលបានធ្វើឱ្យប្រទេសជាតិភ្ញាក់ផ្អើល។

តុលាការធម្មនុញ្ញនឹងសម្រេចថាតើត្រូវដកលោក Yoon ចេញពីតំណែងនៅពេលណាក្នុងរយៈពេលប្រាំមួយខែខាងមុខនេះ។ ប្រសិនបើលោកត្រូវបានគេដកពីតំណែង ការបោះឆ្នោតមុនអាណត្តិនឹងត្រូវបានរៀបចំឡើង។

លោក Yoon គឺជាប្រធានាធិបតីអភិរក្សនិយមទីពីរជាប់ៗគ្នាដែលត្រូវបានចោទប្រកាន់ទម្លាក់តំណែងនៅកូរ៉េខាងត្បូង។ គួររម្លឹកថា អតីតប្រធានាធិបតី លោកស្រី ផាក គុនហេ (Park Geun-hye) ត្រូវបានដកចេញពីតំណែងក្នុងឆ្នាំ២០១៧។ 

លោក Yoon បានលើកឡើងថា "ទោះបីជាខ្ញុំកំពុងឈប់នៅពេលនេះក៏ដោយ ប៉ុន្តែដំណើរដែលខ្ញុំបានដើរជាមួយប្រជាជនក្នុងរយៈពេល ២ឆ្នាំកន្លះកន្លងមកនេះឆ្ពោះទៅអនាគត មិនត្រូវបញ្ឈប់ឡើយ។ ខ្ញុំនឹងមិនបោះបង់ចោលនោះទេ"។

ដោយចាត់ទុកថាជាអ្នករស់រានក្នុងនយោបាយដ៏លំបាកប៉ុន្តែកាន់តែឯកោ លោក Yoon មានរឿងអាស្រូវផ្ទាល់ខ្លួន និងជម្លោះផ្ទៃក្នុងជាច្រើន ប្រឈមមុខនឹងបក្សប្រឆាំងដែលមិនព្រមចុះចាញ់ ការបែកបាក់ក្នុងបក្សរបស់ខ្លួនផ្ទាល់ ព្រមទាំងការធ្លាក់ចុះនៃអត្រាគាំទ្រពីសាធារណជន៕