រលកត្រជាក់បានបោកបក់ទូទាំងតំបន់ភាគខាងជើងប្រទេសឥណ្ឌា ក្នុងពេលដែលសីតុណ្ហភាពធ្លាក់ចុះខ្លាំងក្នុងតំបន់នៅថ្ងៃអាទិត្យ (១៥ ធ្នូ) ខណៈរដូវរងារបានលេចចេញជារូបរាងបណ្ដើរៗ។

ក្រសួងឧតុនិយមឥណ្ឌា បានចេញការព្រមានអំពីអាកាសធាតុ ដោយនិយាយថា ស្ថានភាពនៃរលកដ៏ត្រជាក់ខ្លាំងទំនងជានៅតែបន្តកើតមាននៅក្នុងទីតាំងជាច្រើន ដូចជាទីក្រុង ញូវដេលី (New Delhi), រដ្ឋ អ៊ូតា ប្រទេស (Uttar Pradesh), ផ្នែកខ្លះនៃរដ្ឋ រាជស្ថាន (Rajasthan), ចាមមូ (Jammu) និង កាស្មៀរ (Kashmir) ព្រមទាំងតំបន់ ផុនចាប (Punjab)។

តំបន់បឹង ដាល់ (Dal Lake) ដែលជាតំបន់ទេសចរណ៍ដ៏សំខាន់មួយក្នុងតំបន់កាស្មៀររបស់ប្រទេសឥណ្ឌា ត្រូវបានគ្របដណ្តប់ដោយស្រទាប់អ័ព្ទត្រជាក់ដ៏ស្តើងនៅថ្ងៃអាទិត្យនេះ ហើយស៊ីតុណ្ហភាពបន្តចុះត្រជាក់ជាបន្តបន្ទាប់។

ទន្ទឹមនឹងនេះ អ្នកស្រុកនៅភាគខាងលិចនៃរដ្ឋ រាជស្ថាន បានងាកមកអង្គុយជុំវិញភ្នក់ភ្លើង និងផឹកភេសជ្ជៈក្តៅៗ ដើម្បីរក្សាកម្ដៅក្នុងខ្លួនទប់ទល់នឹងភាពត្រជាក់។ ដោយស្ថិតនៅតំបន់ត្រូពិក ផ្នែកភាគច្រើនរបស់ប្រទេសឥណ្ឌា មើលឃើញរដូវក្តៅដែលមានអាកាសធាតុក្តៅខ្លាំង និងរដូវរងាដែលមានអាកាសធាតុត្រជាក់ខ្លាំងខុសពីតំបន់ផ្សេង៕