ក្រុមបាតុករបានប្រមូលផ្តុំគ្នានៅទីក្រុងឡុងដ៍្រ នៅចក្រភពអង់គ្លេស កាលពីថ្ងៃសៅរ៍ (១៤ ធ្នូ) ដើម្បីតវ៉ាប្រឆាំងនឹងការឡើងថ្លៃជួលលំនៅឋាននៅក្នុងទីក្រុង។ ក្រុមរៀបចំការតវ៉ាគឺសហភាពអ្នកជួលផ្ទះនៅទីក្រុងឡុងដ៍្រ ហៅកាត់ថាក្រុម LRU បាននិយាយថា ការឡើងថ្លៃជួលនេះកំពុងតែបំផ្លាញសហគមន៍។

ក្រុមនេះបាននិយាយថា ព្រឹត្តិការណ៍នេះបានកើតឡើងស្របពេលមានកំណើនបាតុកម្មដឹកនាំដោយអ្នកជួលនៅទូទាំងទ្វីបអឺរ៉ុប ដើម្បីបង្ហាញពីផលប៉ះពាល់នៃថ្លៃជួលដ៏ខ្ពស់ និងដើម្បីទាមទារឱ្យមានការគ្រប់គ្រងលើតម្លៃ។

ក្រុម LRU បញ្ជាក់ថា មនុស្សរហូតដល់ ៥០០នាក់ បានដើរដង្ហែតវ៉ាឆ្លងកាត់កណ្តាលទីក្រុងឡុងដ៍្រ កាលពីថ្ងៃសៅរ៍ ដែលជាថ្ងៃទិញទំនិញដ៏ធំបំផុតប្រចាំឆ្នាំដើម្បីតវ៉ា "ប្រឆាំងនឹងការឡើងថ្លៃជួល" និង "ការកេងប្រវ័ញ្ច" ពីអ្នកជួល។

ក្រុម LRU លើកឡើងថា ជាមួយនឹងតម្លៃជួលជាមធ្យមនៅទីក្រុងឡុងដ៍្រ ឈានដល់ ២.១៧២ផោន ក្នុងមួយខែ - យោងតាមតួលេខផ្លូវការ - មនុស្សជាច្រើនកំពុងជួបទុក្ខលំបាក ខណៈពួកគេព្យាយាមគ្របដណ្តប់ការចំណាយ។ យោងតាមតួលេខរបស់ការិយាល័យស្ថិតិជាតិនាពេលថ្មីៗនេះបង្ហាញថា ទីក្រុងឡុងដ៍្រ ជាតំបន់របស់អង់គ្លេស ដែលមានអតិផរណាជួលខ្ពស់បំផុតក្នុងរយៈពេល ១២ខែដល់ខែតុលា ឆ្នាំ២០២៤ នៅកម្រិត ១០,៤%៕