សម្ព័ន្ធគ្រូពេទ្យសហភាពសហព័ន្ធយុវជនកម្ពុជា (ស.គ.ស.ស.យ.ក.) បានប្រកាសទទួលស្គាល់សមាសភាពថ្នាក់ដឹកនាំ និងសមាជិក សមាជិកាថ្មីសរុបចំនួនជាងពីរពាន់នាក់ ដែលមកពីសាខាមជ្ឈមណ្ឌលជាតិផ្តល់ឈាម មន្ទីរពេទ្យរដ្ឋ និងសាកលវិទ្យាល័យនានា។
ឯកឧត្តម ហ៊ុន ម៉ានី ឧបនាយករដ្ឋមន្រ្តី រដ្ឋមន្រ្តីក្រសួងមុខងារសាធារណៈ និងជាប្រធានក្រុមប្រឹក្សាភិបាល នៃសម្ព័ន្ធគ្រូពេទ្យសហភាពសហព័ន្ធយុវជនកម្ពុជា ស.ស.យ.ក នៅរសៀលថ្ងៃទី១៥ខែធ្នូនេះ បានអញ្ជើញជាអធិបតីក្នុងពិធីប្រកាសទទួលស្គាល់សមាសភាពថ្នាក់ដឹកនាំ និងសមាជិក សមាជិកាថ្មី នៃសម្ព័ន្ធគ្រូពេទ្យ ស.ស.យ.ក និងអបអរសាទរខួប១០ឆ្នាំនៃថ្ងៃបង្កើតសម្ព័ន្ធគ្រូពេទ្យ ស.ស.យ.ក ដែលបានរៀបចំធ្វើឡើងនៅសាកលវិទ្យាល័យប៊ែលធីអន្តរជាតិ សាខាចោមចៅ រាជធានីភ្នំពេញ។
នៅអង្គពិធីឯកឧត្តម ហ៊ុន ម៉ានី ប្រធានក្រុមប្រឹក្សាភិបាលនៃសម្ព័ន្ធគ្រូពេទ្យ ស.ស.យ.ក បានថ្លែងថា ឆ្នាំនេះជាខួប១០ឆ្នាំ ដែលសម្ព័ន្ធគ្រូពេទ្យ ស.ស.យ.ក បានបង្កើតឡើង ដោយក្នុងរយៈពេល១០ឆ្នាំនេះ សម្រេចបានសមិទ្ធផលជាច្រើនរួមមាន៖ ការពង្រឹងរចនាសម្ព័ន្ធផ្ទៃក្នុង ការចុះពិនិត្យព្យាបាលជូនប្រជាពលរដ្ឋនៅមូលដ្ឋានដោយឥតគិតថ្លៃ និងជាពិសេសការប្រយុទ្ធប្រឆាំងក្នុងសមរភូមិជំងឺរាតត្បាតសកល ខូវីដ-១៩ រួមទាំងសកម្មភាពផ្សេងៗជាច្រើនទៀតផងដែរ។ បន្ថែមលើនេះ ឯកឧត្តម ហ៊ុន ម៉ានី បានស្វាគមន៍យ៉ាងកក់ក្ដៅចំពោះសមាសភាពថ្នាក់ដឹកនាំ និងសមាជិក សមាជិកាថ្មី ដែលបានចូលរួមក្នុងក្រុមគ្រួសារសម្ព័ន្ធគ្រូពេទ្យ ស.ស.យ.ក ដែលសម្ព័ន្ធគ្រូពេទ្យ ស.ស.យ.ក មានបេកកម្មក្នុងបុព្វេហេតុជាតិ និងកិច្ចការងារសង្គមនានា ជាពិសេសការលើកកម្ពស់សុខុមាលភាពប្រជាពលរដ្ឋកម្ពុជា។
សមាសភាពថ្នាក់ដឹកនាំ និងសមាជិក សមាជិកាថ្មី បានប្រាប់BTVឱ្យថា ការសម្រេចចូលរួមក្នុងសម្ព័ន្ធគ្រូពេទ្យ ស.ស.យ.ក គឺដើម្បីចង់ចូលរួមចំណែកលើកកម្ពស់សុខភាពប្រជាពលដ្ឋនៅកម្ពុជាឱ្យមានសុខភាពល្អ និងអប់រំឱ្យយល់ដឹងពីរបៀបថែទាំសុខភាពកុំឱ្យមានជំងឺ។ លើសពីនេះ ពួកគេបានប្តេជ្ញា បំពេញឱ្យការងារឱ្យល្អ ស្របទៅតាមបទផ្ទៃក្នុងរបស់សម្ព័ន្ធគ្រូពេទ្យ ស.ស.យ.ក។
គួរបញ្ជាក់ដែរថា សម្ព័ន្ធគ្រូពេទ្យស.ស.យ.ក បានប្រកាសទទួលស្គាល់សមាសភាពថ្នាក់ដឹកនាំ និងសមាជិក សមាជិកាថ្មី នៅពេលនេះ សរុបចំនួន២,៧០១នាក់ មកពីសាខាចំនួន៨រួមមាន៖ ទី១.មន្ទីរពេទ្យកាល់ម៉ែត ទី២.មន្ទីរពេទ្យកុមារជាតិ ទី៣.មជ្ឈមណ្ឌលជាតិផ្តល់ឈាម ទី៤.សាកលវិទ្យាល័យអន្តរជាតិ ទី៥.សាកលវិទ្យាល័យពុទ្ធិសាស្រ្ត ទី៦.សាកលវិទ្យាល័យន័រតុន ទី៧.សាលាបច្ចេកទេសថែទាំវេជ្ជសាស្រ្ត និងទី៨.សាលាមធ្យសិក្សាសុខាភិបាលភូមិភាគស្ទឹងត្រែង៕ អត្ថបទ៖ ទូច សោភ័ណ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
