ប្រភពវេជ្ជសាស្រ្តបាននិយាយកាលពីថ្ងៃអាទិត្យថាពលរដ្ឋប៉ាឡេស្ទីន យ៉ាងហោចណាស់៣៤ នាក់បានស្លាប់ និងរាប់សិបនាក់រងរបួសក្នុងការវាយប្រហាររបស់អ៊ីស្រាអែលលើសាលារៀនដែលធ្វើជាលំនៅដ្ឋានសម្រាប់គ្រួសាររត់គេចចេញពីផ្ទះសម្បែង និងជំរំតង់នៅទូទាំងតំបន់ហ្កាហ្សាស្ទ្រីប។

ប្រភពវេជ្ជសាស្ត្របាននិយាយថាមនុស្ស១៥នាក់បានស្លាប់នៅពេលកងកម្លាំងអ៊ីស្រាអែលវាយឆ្មក់ សាលារៀនមួយដែលជាផ្ទះសម្រាប់គ្រួសារភៀសខ្លួននៅភូមិ អ៊ីស្បាត អាប់រ៉ាបូ (Izbat Abd Rabbo) ជាសង្កាត់មួយនៅភាគខាងជើងនៃទីប្រជុំជន បេត ហាណោន(Beit Hanoun)។

អ្នកឃើញហេតុការណ៍បាននិយាយថា កងកម្លាំងអ៊ីស្រាអែលបានវាយឆ្មក់ចូលសាលារៀន Khalil Oweida បន្ទាប់ពីមានការឡោមព័ទ្ធអស់ជាច្រើនម៉ោងស្របពេលមានការបាញ់ស្រោចដោយកាំភ្លើងនិងការបាញ់ផ្លោងកាំភ្លើងធំ។

ប្រភពវេជ្ជសាស្ត្របាននិយាយថា យន្តហោះចម្បាំងអ៊ីស្រាអែលបានវាយប្រហារផ្ទះមួយក្នុងសង្កាត់ al-Nafaq ភាគខាងជើងហ្កាហ្សា សម្លាប់មនុស្ស៥នាក់ និងជាច្រើននាក់ផ្សេងទៀតរងរបួស។

ប្រភពដដែលបានបន្ថែមថា មនុស្សបីនាក់ទៀតបានស្លាប់ និងជាច្រើននាក់ទៀតរងរបួសក្នុងការវាយប្រហារមួយទៀតលើផ្ទះជនជាតិប៉ាឡេស្ទីនក្នុងសង្កាត់ Zeitoun ក្នុងក្រុង ហ្កាហ្សា។

ប្រភពមួយផ្សេងទៀតបាននិយាយថា សាកសពមនុស្ស ៤ នាក់ត្រូវបានគេរកឃើញបន្ទាប់ពីការវាយប្រហាររបស់អ៊ីស្រាអែលលើផ្ទះមួយផ្សេងទៀតក្នុងសង្កាត់ Sheikh Radwan ក្នុងទីក្រុងហ្កាហ្សា ដែលធ្វើឱ្យចំនួនអ្នកស្លាប់ក្នុងការវាយប្រហារកើនឡើងដល់ ៧ នាក់ ។

អ៊ីស្រាអែលបានចាប់ផ្តើមសង្រ្គាមប្រល័យពូជសាសន៍នៅលើតំបន់ហ្កាហ្សាស្ទ្រីប ដែលបានសម្លាប់ជនរងគ្រោះជាង៤៤.៩០០នាក់ភាគច្រើនជាស្ត្រី និងកុមារ ចាប់តាំងពីការវាយប្រហាររបស់ក្រុមហាម៉ាសកាលពីថ្ងៃទី៧ ខែតុលា២០២៣៕