នាយករដ្ឋមន្ត្រីអ៊ីស្រាអែល លោក Benjamin Netanyahu បានលើកឡើងកាលពីថ្ងៃអាទិត្យ (១៥ ធ្នូ) ថា លោកបានពិភាក្សាជាមួយប្រធានាធិបតីជាប់ឆ្នោតអាមេរិក លោក Donald Trump អំពីស្ថានការណ៍នៅក្នុងប្រទេសស៊ីរី និងការជំរុញនាពេលថ្មីៗនេះ ដើម្បីធានាបាននូវការដោះលែងចំណាប់ថ្នូរអ៊ីស្រាអែល និងបរទេស ដែលត្រូវបានចាប់ដោយក្រុមហាម៉ាស នៅតំបន់ហ្កាហ្សា។

លោក Netanyahu បាននិយាយថា រូបលោក និងលោក Trump បានពិភាក្សាគ្នានៅយប់ថ្ងៃសៅរ៍ អំពីរឿងទាំងនេះ ដែលនឹងក្លាយជាបញ្ហាប្រឈមបរទេសដ៏សំខាន់មួយ សម្រាប់លោក Trump រ៉ាប់រង នៅពេលលោកចូលកាន់តំណែង ប្រសិនបើបញ្ហាទាំងនោះមិនត្រូវបានដោះស្រាយមុនថ្ងៃឡើងកាន់តំណែង ២០ ខែមករា ឆ្នាំក្រោយទេនោះ។

ក្រុមសកម្មប្រយុទ្ធដឹកនាំដោយក្រុមហាម៉ាស បានសម្លាប់មនុស្ស ១.២០០នាក់ និងចាប់ខ្លួនមនុស្សជាង ២៥០នាក់ រួមទាំងជនជាតិអ៊ីស្រាអែលសញ្ជាតិអាមេរិក ២នាក់ ក្នុងអំឡុងការវាយប្រហាររបស់ពួកគេកាលពីថ្ងៃទី០៧ ខែតុលា ឆ្នាំ២០២៣ លើអ៊ីស្រាអែល នេះបើយោងតាមចំនួនសរុបរបស់អ៊ីស្រាអែល។

ចំណាប់ថ្នូរជាង ១០០នាក់ ត្រូវបានដោះលែងតាមរយៈការចរចា ឬប្រតិបត្តិការជួយសង្គ្រោះរបស់យោធាអ៊ីស្រាអែល។ ក្នុងចំណោមមនុស្សប្រហែល ១០០នាក់ ដែលនៅតែត្រូវបានឃុំខ្លួននៅហ្កាហ្សា មានតែប្រហែលពាក់កណ្តាលប៉ុណ្ណោះដែលគេជឿថានៅមានជីវិត។

លោក Trump បានព្រមានកាលពីដើមខែនេះថា នឹងមាន "ការខាតបង់ធ្ងន់ធ្ងរ" នៅមជ្ឈិមបូព៌ា ប្រសិនបើចំណាប់ថ្នូរមិនត្រូវបានដោះលែងមុនពេលលោកចូលកាន់តំណែង៕