អ្នកនាំពាក្យតុលាការបាននិយាយថា តុលាការធម្មនុញ្ញរបស់កូរ៉េខាងត្បូង នៅថ្ងៃចន្ទ (១៦ ធ្នូ) នេះ នឹងចាប់ផ្តើមពិនិត្យមើលញត្តិចោទប្រកាន់ទម្លាក់តំណែងរបស់លោកប្រធានាធិបតី Yoon Suk Yeol ជុំវិញការប៉ុនប៉ងដាក់ច្បាប់អាជ្ញាសឹកកាលពីថ្ងៃទី០៣ ខែធ្នូ ខណៈសារព័ត៌មានយ៉ុនហាប់រាយការណ៍ថា ក្រុមស៊ើបអង្កេតគ្រោងនឹងនាំខ្លួនលោកទៅសួរនាំនៅសប្តាហ៍នេះ។

ចៅក្រមទាំង ៦រូបរបស់តុលាការបច្ចុប្បន្ន នឹងចូលរួមកិច្ចប្រជុំលើកដំបូង ស្តីពីញត្តិចោទប្រកាន់ទម្លាក់តំណែង ដែលសភាដឹកនាំដោយគណបក្សប្រឆាំងបានអនុម័តកាលពីថ្ងៃសៅរ៍។ តុលាការមានពេលដល់ទៅ ៦ខែដើម្បីសម្រេចថា តើត្រូវដកលោក Yoon ចេញពីតំណែង ឬក៏ត្រូវដាក់ឱ្យលោកកាន់តំណែងឡើងវិញ។

លោក Yoon និងមន្ត្រីជាន់ខ្ពស់មួយចំនួន ប្រឈមមុខនឹងលទ្ធភាពនៃការចោទប្រកាន់ពីបទបះបោរដោយសារតែច្បាប់អាជ្ញាសឹករយៈពេលខ្លីនោះ។ សារព័ត៌មានយ៉ុនហាប់ បានរាយការណ៍ថា អ្នកស៊ើបអង្កេតរួមគ្នាមួយក្រុមមកពីនគរបាល ក្រសួងការពារជាតិ និងទីភ្នាក់ងារប្រឆាំងអំពើពុករលួយ គ្រោងនឹងកោះហៅលោក Yoon ទៅសាកសួរនៅថ្ងៃពុធ (១៨ ធ្នូ) ខាងមុខនេះ។

ការិយាល័យស៊ើបអង្កេតមិនទាន់ចេញការបញ្ជាក់នៅឡើយទេ ហើយកាលពីថ្ងៃអាទិត្យ សារព័ត៌មានយ៉ុនហាប់រាយការណ៍ថា លោក Yoon ក៏មិនបានបង្ហាញខ្លួនឆ្លើយតបទៅនឹងការកោះហៅសាកសួរដោយក្រុមស៊ើបអង្កេតដាច់ដោយឡែកមួយទៀតពីការិយាល័យរដ្ឋអាជ្ញាដែរ៕