ប្រព័ន្ធផ្សព្វផ្សាយរដ្ឋកូរ៉េខាងជើង នៅថ្ងៃចន្ទ (១៦ ធ្នូ) នេះ បានរិះគន់យ៉ាងចាស់ដៃលើប្រធានាធិបតីកូរ៉េខាងត្បូង លោក Yoon Suk Yeol ដោយហៅលោកថា "មេដឹកនាំនៃការបះបោរ" ជាប្រតិកម្មលើកដំបូងរបស់ខ្លួនក្រោយការចោទប្រកាន់ទម្លាក់តំណែង ជុំវិញក្រឹត្យច្បាប់អាជ្ញាសឹក។

ទីក្រុងព្យុងយ៉ាង បាននឹងកំពុងប្រើវោហាសាស្រ្តធ្ងន់ៗជុំវិញភាពចលាចលផ្នែកនយោបាយរបស់កូរ៉េខាងត្បូង ដែលហាក់បញ្ចប់កាលពីថ្ងៃសៅរ៍ បន្ទាប់ពីសភាទីក្រុងសេអ៊ូល បានបោះឆ្នោតចោទប្រកាន់ទម្លាក់តំណែងលោក Yoon ពីបទ "បះបោរ"។

នៅថ្ងៃចន្ទនេះ ទីភ្នាក់ងារសារព័ត៌មានរដ្ឋរបស់ទីក្រុងព្យុងយ៉ាង KCNA បានរាយការណ៍ថា លោក Yoon បានព្យាយាមទម្លាក់ការទទួលខុសត្រូវចំពោះ "ការប្រកាសច្បាប់អាជ្ញាសឹកបន្ទាន់" របស់ខ្លួនទៅលើបក្សប្រឆាំង។

ប្រព័ន្ធផ្សព្វផ្សាយរដ្ឋកូរ៉េខាងជើង ជារឿយៗសំដៅទៅលើមេដឹកនាំ និងស្ថាប័នរបស់កូរ៉េខាងត្បូងថាជា "អាយ៉ង" របស់សម្ព័ន្ធមិត្តសន្ធិសញ្ញារបស់ខ្លួន គឺសហរដ្ឋអាមេរិក។ ទំនាក់ទំនងរវាងកូរ៉េទាំងពីរបានឈានដល់ចំណុចទាបបំផុតមួយក្នុងរយៈពេលប៉ុន្មានឆ្នាំមកនេះ ដោយកូរ៉េខាងជើង បានបាញ់មីស៊ីលបាលិស្ទិកជាច្រើន ក្នុងការរំលោភលើទណ្ឌកម្មរបស់អង្គការសហប្រជាជាតិ៕