អាស៊ាន៖ មេដឹកនាំមកពីអាស៊ីប៉ាស៊ីហ្វិក និងប្រទេសដទៃទៀតបានជំរុញឱ្យមានការអត់ធ្មត់ដោយខ្លួនឯង នៅក្នុងសកម្មភាពដែលអាចបង្កើនភាពតានតឹងបន្ថែមទៀតនៅក្នុងសមុទ្រចិនខាងត្បូង។ កិច្ចប្រជុំកំពូលអាស៊ីបូព៌ាដែលមានការចូលរួមពីសមាជិកនៃសមាគមប្រជាជាតិអាស៊ីអាគ្នេយ៍ ជប៉ុន សហរដ្ឋអាមេរិក ចិន និងប្រទេសដទៃទៀតត្រូវបានធ្វើឡើងតាមប្រព័ន្ធអ៊ីនធឺណិតកាលពីថ្ងៃពុធ។
សេចក្ដីថ្លែងការណ៍របស់ប្រធានជំនួបកំពូល ដែលបានចេញផ្សាយកាលពីថ្ងៃព្រហស្បតិ៍បាននិយាយថា ពាក់ព័ន្ធនឹងបញ្ហាសមុទ្រចិនខាងត្បូង “ការព្រួយបារម្ភត្រូវបានសម្ដែងដោយមេដឹកនាំមួយចំនួន លើការទាមទារសិទ្ធិគ្រប់គ្រងដែនដីឡើងវិញ សកម្មភាពនានា និងឧបទ្ទវហេតុធ្ងន់ធ្ងរនៅក្នុងតំបន់... ដែលបានបំផ្លាញភាពជឿជាក់ និងទំនុកចិត្ត ភាពតានតឹងដែលចេះកើនឡើង និងអាចបំផ្លាញសន្តិភាព សន្តិសុខ និងស្ថិរភាពក្នុងតំបន់។ សេចក្ដីថ្លែងការណ៍នៅឆ្នាំនេះប្រើពាក្យ "ក្ដីកង្វល់" ជាជាង "ការព្រួយបារម្ភធ្ងន់ធ្ងរ" ដែលត្រូវបានប្រើកាលពីឆ្នាំមុន។ សេចក្ដីថ្លែងការណ៍ចុងក្រោយបានបន្ថែមថា មេដឹកនាំបានសង្កត់ធ្ងន់លើសារៈសំខាន់នៃការមិនដាក់ពង្រាយកម្លាំងយោធា និងការអត់ធ្មត់ដោយខ្លួនឯង ក្នុងការធ្វើសកម្មភាពទាំងអស់របស់អ្នកទាមទារ និងរដ្ឋផ្សេងទៀតទាំងអស់... ដែលអាចធ្វើអោយស្ថានការណ៍កាន់តែស្មុគស្មាញ និងបង្កើនភាពតានតឹងនៅសមុទ្រចិនខាងត្បូង។
ប្រទេសអាស៊ានមួយចំនួនមានការព្រួយបារម្ភ ដែលមិនត្រឹមតែការដាក់ពង្រាយយោធារបស់ទីក្រុងប៉េកាំងនៅក្នុងតំបន់នោះប៉ុណ្ណោះទេ ថែមទាំងមានការបែកបាក់កាន់តែស៊ីជម្រៅរវាងសហរដ្ឋអាមេរិក និងចិនផងដែរ។ ថ្មីៗនេះ សហរដ្ឋអាមេរិកបានបង្កើតក្របខណ្ឌសន្តិសុខដែលគេស្គាល់ថាជា AUKUS ជាមួយប្រទេសអូស្ត្រាលី និងអង់គ្លេសនៅក្នុងតំបន់ឥណ្ឌូប៉ាស៊ីហ្វិក ក្នុងសកម្មភាពទំនងជាដើម្បីរក្សាប្រទេសចិនឱ្យស្ថិតក្រោមការត្រួតពិនិត្យ៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
