លោកប្រធានាធិបតី Xi Jinping បានលើកឡើងនៅក្នុងសុន្ទរកថាដែលចេញផ្សាយនៅថ្ងៃចន្ទ (១៦ ធ្ន) នេះថា បក្សកុម្មុយនិស្តចិន ត្រូវតែ "ចាត់វិធានការពន្លឿន" ការលុបបំបាត់បញ្ហាវិន័យ រួមទាំងអំពើពុករលួយផងដែរ ក្នុងការអំពាវនាវថ្មីមួយដើម្បីតាមប្រមាញ់មន្ត្រីពុករលួយ និងអ្នកដែលជួយប្រព្រឹត្តអំពើខុសច្បាប់ទាំងនេះ។

ចាប់តាំងពីឡើងកាន់អំណាចជាងមួយទស្សវត្សរ៍មុនមក លោក Xi បានបង្រ្កាបអំពើពុករលួយដែលពាក់ព័ន្ធនឹងសមាជិកបក្ស មិនថាពួកគេជាមន្រ្តីថ្នាក់ខ្ពស់ ឬអ្នកតូចតាចកម្រិតណាក៏ដោយ ដែលមិនអនុវត្តគោលនយោបាយរបស់រដ្ឋាភិបាល។

ប៉ុន្តែបើទោះជាមានការបង្រ្កាបយ៉ាងខ្លាំងក៏ដោយ ក៏គណបក្សនៅតែបន្តញាំញីដោយអំពើពុករលួយ ជាពិសេសក្នុងជួរកងកម្លាំងប្រដាប់អាវុធ។ អតីតរដ្ឋមន្ត្រីក្រសួងការពារជាតិពីររូបត្រូវបានបណ្តេញចេញពីបក្សក្នុងពេលពីរឆ្នាំចុងក្រោយនេះពីបទ "បំពានវិន័យយ៉ាងធ្ងន់ធ្ងរ" ដែលជាឃ្លាមានន័យថា "អំពើពុករលួយ"។

លោក Xi បានព្រមាននៅក្នុងសុន្ទរកថាពីទស្សនាវដ្តីបក្សដ៏ល្បីមួយថា គណបក្សត្រូវតែចាត់វិធានការមិនបន្ធូរដៃ ប្រឆាំងនឹងអ្នកណាក៏ដោយដែលមិនគោរពច្បាប់ រួមានក្រុមពាក់ព័ន្ធ អង្គការមានអំណាច ឬវណ្ណៈឯកសិទ្ធិ ដែលបំពានវិន័យ ឬប្រព្រឹត្តអំពើពុករលួយ ចេញឱ្យអស់ពីសមាជិកបក្ស៕