ប្រទេសថៃ បាននិយាយនៅថ្ងៃចន្ទ (១៦ ធ្នូ) នេះថា ខ្លួននឹងធ្វើជាម្ចាស់ផ្ទះនៃកិច្ចប្រជុំថ្នាក់តំបន់ចំនួនពីរស្ដីពីវិបត្តិមីយ៉ាន់ម៉ាក្នុងសប្តាហ៍នេះ ដោយយ៉ាងហោចណាស់មានតំណាងមួយរូបនៃរបបសឹក ខណៈនាយករដ្ឋមន្ត្រីម៉ាឡេស៊ីបាននិយាយថា កិច្ចខិតខំប្រឹងប្រែងកំពុងត្រូវបានធ្វើឡើងដើម្បីនាំមីយ៉ាន់ម៉ា ឱ្យសកម្មក្នុងប្លុកអាស៊ានវិញ។

រដ្ឋមន្ត្រីការបរទេសថៃ លោក ម៉ារីត សាង៉ាមពង្ស (Maris Sangiampongsa) នឹងពិភាក្សាដាច់ដោយឡែកពីគ្នាក្នុងកិច្ចប្រជុំនៅថ្ងៃទី១៩ និង ២០ ខែធ្នូ បន្ទាប់ពីថៃ កាលពីខែតុលា បានស្នើធ្វើជាម្ចាស់ផ្ទះកិច្ចពិភាក្សាក្រៅផ្លូវការដើម្បីស្វែងរកផ្លូវចេញពីវិបត្តិដែលគ្របដណ្ដប់មីយ៉ាន់ម៉ា ចាប់តាំងពីរដ្ឋប្រហារយោធាឆ្នាំ២០២១ មក។

តំណាងមកពីមីយ៉ាន់ម៉ា នឹងចូលរួមក្នុងកិច្ចប្រជុំនៅថ្ងៃព្រហស្បតិ៍ (១៩ ធ្នូ) នេះ ដែលអ្នកនាំពាក្យក្រសួងការបរទេសថៃ និយាយថានឹងក្លាយជាការពិគ្រោះយោបល់ក្រៅផ្លូវការស្តីពីសន្តិសុខព្រំដែន និងឧក្រិដ្ឋកម្មឆ្លងដែន។ តំណាងមកពីប្រទេសចិន ឥណ្ឌា បង់ក្លាដែស ឡាវ និងថៃ ដែលសុទ្ធតែមានព្រំប្រទល់ជាប់មីយ៉ាន់ម៉ា ក៏នឹងចូលរួមផងដែរ។

អ្នកនាំពាក្យបន្តថា នៅថ្ងៃសុក្រ (២០ ធ្នូ) នឹងមានកិច្ចប្រជុំថ្នាក់រដ្ឋមន្ត្រីការបរទេសមួយស្តីពីមីយ៉ាន់ម៉ា សម្រាប់ "សមាជិកដែលចាប់អារម្មណ៍" នៃសមាគមប្រជាជាតិអាស៊ីអាគ្នេយ៍ (អាស៊ាន) រួមទាំងកិច្ចពិភាក្សាពីផែនការ “មតិឯកច្ឆ័ន្ទសន្តិភាពប្រាំចំណុច” របស់អាស៊ានសម្រាប់សន្តិភាពនៅក្នុងប្រទេសនេះ។ គេមិនច្បាស់ទេថា តើមីយ៉ាន់ម៉ា នឹងមានតំណាងណាមួយនៅក្នុងកិច្ចប្រជុំថ្ងៃសុក្រនេះឬយ៉ាងណា៕