​បាល់ទាត់៖ ​ក្រុម​ម្ចាស់ផ្ទះ​អង់គ្លេស​ត្រូវបាន​ចាប់ឆ្នោត​ស្ថិតក្នុង​ពូ​ល A រួមជាមួយ​ក្រុម​ក្បែរ​របង​រួម​ចក្រភព​អង់គ្លេស ​អៀក​ឡង់​ខាង​ជើង ​ក្នុង​ព្រឹត្តិការណ៍​បាល់ទាត់​ស្ត្រី​ជើងឯក​ទ្វីបអឺរ៉ុប ២០២២​។ ​​ក្រៅពី​អៀក​ឡង់​ខាងជើង អង់គ្លេស​ក៏​នឹង​ត្រូវ​ជួប​ជាមួយ​ណ័​រវេ​យ និង​អូទ្រីស​ផងដែរ​។

​​ជំនួប​ដំបូង​នៃ​ព្រឹត្តិការណ៍​គឺ​អង់គ្លេស​ត្រូវ​ជួប​អូទ្រីស​មុនគេ​ថ្ងៃ​បើកឆាក​នៅ​ថ្ងៃទី​៦ ខែកក្កដា​នៅ​កីឡដ្ឋាន Old Trafford របស់​បិសាច​ក្រហម Manchester United ខណៈ​វគ្គ​ផ្តាច់ព្រ័ត្រ​នឹងធ្វើ​នៅ​កីឡដ្ឋាន Wembley ថ្ងៃ​ទី​៣១ ខែ​កក្កដា​ឆ្នាំក្រោយ​។ ​លទ្ធផល​ចាប់ឆ្នោត​ពូ​ល​ផ្សេងទៀត​នៅ​ទីក្រុង Manchester ម្សិលមិញ​មាន​ក្រុម​ជើងឯក ៨​សម័យ​អាល្លឺម៉ង់​ដែល​កំពុង​ឈរ​លេខ ៣ ពិភពលោក​នោះ​ត្រូវ​ជួប​ជាមួយ​អេ​ស្ប៉ា​ញ ដា​ណឺ​ម៉ាក និង​ហ្វាំ​ង​ឡង់​នៅក្នុង​ពូ​ល B​។ ​ចំណែក​ក្រុម​ការពារ​ជើងឯក​ហូ​ឡង់​ស្ថិតក្នុង​ពូ​ល C ជាមួយ​ក្រុម​លេខ ២ ពិភពលោក​ស៊ុយអែត ស្វ៊ី​ស និង​រុស្ស៊ី​។ ​ពូ​ល D រួមមាន​បារាំង អ៊ីតាលី ប៊ែ​ល​ហ្ស៊ិ​ក និង​អ៊ី​ស្លង់​។​

​​សូម​បញ្ជាក់​ថា​ អង់គ្លេស​ដែលជា​ម្ចាស់ផ្ទះ​នោះ​នឹង​ប្រើប្រាស់​កីឡដ្ឋាន​ចំនួន ៧ ដែល​រួមមាន Old Trafford របស់ Manchester United, កីឡដ្ឋាន​របស់​ក្លិប Brentford, កីឡដ្ឋាន​របស់​ក្រុមយុវជន Manchester City, កីឡដ្ឋាន​របស់ Sheffield United, Bramall Lane, កីឡដ្ឋាន​របស់​ក្លិប MK Dons, កីឡដ្ឋាន​របស់​ក្លិប Rotherham និង​កីឡដ្ឋាន Leigh Sports Village៕

​អត្ថបទ​៖​នាង សុភា​វុ​ធ